Новa дигиталнa образовнa програмa за млади преку Gaming Garage на ИМКА
Последни новости Новa дигиталнa образовнa програмa за млади преку Gaming Garage на ИМКА Покрај основната програма за дигитално образование на HP life која ИМКА ја спроведува веќе трета година во младинскиот центар во Битола, ИМКА ја прошири понудата со нови дигитални програми преку платформата Gaming Garage HP. Овие дополнителни курсеви ги воведоа младите во креативните дигитални индустрии, меѓу кои развојот на видеоигри, е-спортот, програмирањето, визуелниот дизајн и дигиталното раскажување. Создадени да бидат разбирливи и за почетници, овие курсеви комбинираат креативност и технологија и нудат можности за пристап до модерни, глобални и брзорастечки професии. Четиринеделната хибридна програма која се спроведе оваа пролет искомбинира онлајн учење со состаноци во живо во Младинскиот Центар. Учесниците можеа индивидуално или во тимови да учат од онлјан курсевите и да разменуваат идеи со своите врсници. Програмата дополнително вклучи и студиска посета на локална гејминг компанија каде младите можеа да се запознаат со реални работни позиции и индустриски процеси при креирањето игра за гејминг пазарот. А покрај овие редовни едукативни активности ИМКА ја активираше локалната заедница и преку два специјални Gaming Garage турнири организирани во Младинскиот Центар. Турнирите беа реализирани во два наврати, во пролет и есен, како посебни настани што ги поттикнаа младите да се вклучат, да се забавуваат и да се натпреваруваат играјќи дел од оние игри за кои имаа можност да учат за време на едукативните активности и состаноци. Gaming Garage турнирите беа замислени како многу повеќе од игри – учесниците имаа можност да научат за најдобрите бесплатни онлајн курсеви за гејм-дизајн и употребата на дигитална креативност при создавањето игри, покажувајќи им дека нивното хоби може да прерасне во вештина или можност за идно вработување. По завршувањето на секој курс учесниците добиваат официјален сертификат од HP и edX.Овие иницијативи се отворени за сите млади од 15 до 30 години, без оглед на претходното искуство. Доволни се љубопитноста, желбата за учење и интересот за ИТ технологија. Двете програми HP LIFE курсевите и Gaming Garage се реализираат во партнерство со HP Inc. и ИМКА Европа и претставуваат дел од пошироката Академија за Е-спорт и Развој на Видеоигри на HP. Преку континуирани обуки, заеднички настани и пристап до врвни дигитални ресурси, ИМКА продолжува да ги мотивира младите да учат, создаваат, соработуваат и да ги градат дигиталните вештини што ќе им бидат потребни во иднината.
Оспособување на учениците во Могила преку неформално образование
Последни новости Оспособување на учениците во Могила преку неформално образование Во рамките на нашите заложби да ја направиме младинската работа достапна и во руралните средини во октомври и ноември 2025 испорачавме активности за неформално образование на млади во Општина Могила. Нашиот тим од младински работници одржа серија од три работилници во основното училиште Гоце Делчев во Општина Могила. Работилниците имаат цел да ги зајакнат капацитетите на ученичката организација во ова училиште за учениците самите да можат да креираат и спроведуваат иницијативи што придонесуваат кон за нив во насока на креирање на побезбедна училишна средина Во работилниците учествуваа претседателите и замениците на сите паралелки, како и детскиот правобранител на училиштето, ученици на возраст од 12 до 15 години. На почетокот тие зборуваа за тоа како ја разбираат комуникацијата, што за нив значи вербална и невербална комуникација и како овие елементи влијаат врз нивните односи. Разговараа и за тоа што претставува конфликт, како го препознаваат и каде е правилно да го пријават. Потоа учениците вежбаа донесување одлуки – индивидуално и во група – и ги анализираа факторите што влијаат една групна комуникација да биде успешна и корисна. Следеше сесија со дискусија за тоа како се одржуваат состаноци, начини на водење записник, како се обработуваат точки од дневен ред и како се носат заклучоци. Учениците ги опишуваа досегашните состаноци што ги имале во училиштето и ги споредуваа со научените добри практики. На секој клас му беше зададена задача – во парови да состават петиција или официјално барање до директорот, врз основа на потреба која нивните соученици ја истакнале како значајна.Наредната работилница беа децата беа воведени во основите на истражувачка работа. Учениците учеа да избираат и употребуваат алатки за собирање информации од поголеми групи деца, како што се анкети, прашалници и интервјуа. Секој тим спроведе истражување во училиштето, ги обработи резултатите и ги претстави на последната работилница. Како дополнителна активност, тие го цртаа своето „идеално школо“, а потоа ја споредиja замислата со реалната состојба, анализирајќи што би можело да се подобри. Оваа вежба ги поттикна да размислуваат за ученичка иницијатива што би имала најголемо значење за нивното училиште. Во дискусиите, најголем дел од учениците изразија желба иницијативата да биде креативна и поддржувачка. Така се роди идејата за „Стрипови што менуваат “ – креирање на стрипови од страна на учениците под менторство на наставниците по македонски јазик и ликовно, а со цел да се создаде ученичка стрип – колекција на теми важни за училиштето и заедницата: ученичко учество, превенција од насилство и екологија. Овие понатаму ќе бидат испечатени во хартија и ќе бидат дел од редовната програма на патрониот празник на училиштето кој се одбележува секоја пролет и е значаен настан во оваа локална заедница. Целокупната иницијативата на овој начин помага во подигање на нивото на безбедност, доверба и отвореност меѓу учениците и стручната служба и придонесува кон подобра училишна средина за идните генерации. Во насока на испорака на неформално образование во руралните средини ИМКА соработува со различни партнери. Овие активности се дел во рамките на поширока иницијатива на Коалицијата на младински организации СЕГА, во партнерство со Македонскиот Центар за Граѓанско Образование, Првата детска амбасада во светот Меѓаши и SmartUp – Social Innovation Lab, со поддршка од Детската фондација Песталоци која се реализира во периодот септември 2023 – август 2026. Благодарение на поддршката на Y’s Men International ние сме во позиција да реализираме исто така и серија од нови работилници и во други рурални средини.
Communication Matters: обука и пренос на знаење во три училишта во Битола
Последни новости Communication Matters: обука и пренос на знаење во три училишта во Битола Нашата соработка со училиштата е континуирана и конзистентна. Покрај можностите за едукација на деца нудиме и можности за едукација на персонал. Од 10 до 19 ноември 2025 година претставници од стручните служби на три училишта во Битола учествуваа на Еразмус+ обуката Communication Matters во Брно, Чешка која беше наменета за едукатори, младински работници и фасилитатори. Обуката се фокусираше на ненасилна комуникација, метод развиен од Маршал Розенберг чија цел е да помогне да се разликуваат мислењата од потребите на луѓето и да поттикне разбирање и поврзување дури и во ситуации на несогласување. За време на обуката, учесниците работеа преку теоретски сесии, групни активности, интерактивни вежби и симулации. Учеа како да препознаваат деликатни емоции и да ги разберат потребите зад различните зборови и однесување, како да слушаат емпатично, да комуницираат јасно и да се справуваат со предизвици и тешки ситуации. Овој процес им овозможи да согледаат како изборот на зборови и начинот на комуникација влијаат врз односите и атмосферата во групата. Посебен акцент беше ставен на примена на овие вештини во работа со млади, развивање стратегии за конструктивно решавање конфликти и градење доверба во групата. Во декември 2025 година, учесниците го пренесоа стекнатото знаење во три училишта во Битола – ООУ „Д-р Трифун Пановски“, ООУ „Елпида Караманди“ и ООУ „Гоце Делчев“. Учениците се вклучија во интерактивни работилници, игри и групни активности кои им овозможија на практичен начин да се запознаат со основите на емпатичното слушање, препознавање на чувства и потреби и јасно изразување на мислењето. Активностите создадоа безбеден простор каде младите можеа да ја испробаат комуникацијата, да учат едни од други и да истражуваат различни перспективи, додека истовремено ја зајакнуваа соработката во групата. Обуката и активностите во училиштата беа со цел развој на способноста на учесниците да комуницираат внимателно и со разбирање, да препознаваат потреби и да ги поддржуваат младите во создавање поотворена и безбедна средина. Пренесувањето на стекнатите вештини на локално ниво ја потврдува посветеноста на ИМКА кон градење емпатичен, внимателен и поддржувачки простор за млади, со цел нивен развој и активно учество во заедницата. Овој проект е ко-финансиран од Европската Унија. Фотографиите од обуката во Брно и активностите во Битола можете да ги погледнете во албумот подолу.
Нашите млади во Европскиот камп за лидери во Холандија
Последни новости Нашите млади во Европскиот камп за лидери во Холандија Шест млади луѓе од нашата ИМКА учествуваа на Европскиот летен камп за млади лидери (ESYL) – меѓународна обука одржана во Омен, Холандија, организирана од ИМКА Холандија. Овој уникатен настан, кој стана прекрасна традиција што ги обединува младите лидери од цела Европа, оваа година собра учесници од Холандија, Германија, Франција, Обединетото Кралство, Украина, Португалија, Чешка, Македонија и други земји. Заедно, тие учеа, споделуваа идеи и градеа пријателства што ќе ги обликуваат камповите на утрешнината. Преку четиридневна програма исполнета со интерактивни работилници, тимска работа и практични сесии, учесниците научија за организација на летни кампови, лидерство, комуникација, тимска работа, безбедност, етичкото однесување и традициите на кампот. Секако, имаше и многу игри, логорски оган и моменти полни со вистински камперски дух. Нашата ИМКА е долгогодишен партнер на ИМКА Холандија речиси една деценија и активно учествува во оваа програма од 2015 година, подготвувајќи нови генерации млади луѓе кои ќе ги водат летните кампови на иднината низ цела Европа. Подолу се дадени размислувања од нашите шест учесници – нивните впечатоци, искуства и инспирации од ESYL 2025. Никола Гелов Пристигнувањето во Омен – малото гратче што ќе ми остане врежано во срцето – беше едноставно прекрасно! Бидејќи нашето патување беше најдолго, нашата група пристигна последна. Се сместивме во нашите соби и од тој момент започна она што би го нарекол целосна поврзаност! Запознавање нови луѓе, размена на мисли, многу смеа, игри и пријателства, забава, пеење и пред сè, ширење позитивна енергија! Во текот на сите пет дена, навистина се чувствував како дома. Секој ден носеше нова приказна. Како лидер на мојата група, бев премногу горд на сите што беа дел од нашиот тим! Забавата и поврзаноста никогаш не завршија. Но, како и со сите добри работи, мораше да заврши. Стефанија Димитријовска Искуството беше спонтано, исполнето со смеа, нови пријателства и долги разговори на сите видови теми. Имаше околу 40 волонтери и лидери кои сакаа да ги продлабочат своите лидерски вештини и личен пристап. Токму тоа го учев таму – лидерство. Поконкретно, научив како да применувам различни пристапи за лидерство во различни ситуации и како еден вид пристап понекогаш може да функционира подобро од друг. Јована Кирјаковска Бев воодушевена и многу благодарна за можноста. Сите активности беа неверојатни, особено последниот ден кога имавме вежба за комуникација и стилови на комуникација. Секој избра боја што го претставуваше него/неа, па откривме колку сме различни и уникатни сите. Стекнав нови пријатели и стекнав нови знаења и искуства што се многу применливи во секојдневниот живот. Би го препорачала ова искуство на сите млади луѓе, бидејќи тоа е нешто што навистина ќе им помогне во нивната иднина. Владимир Гелов Она што ми се допадна најмногу беше тимскиот дух и интерактивните работилници. Сесиите за групна динамика и социјална безбедност беа одлични и ми помогнаа да се отворам повеќе во тимска средина. Научив многу за важноста на активното слушање, емпатијата и безбедната комуникација во рамките на групата. Сфатив како малите гестови имаат големо влијание врз чувството на припадност и доверба во тимот. Овој камп ми помогна да станам посвесен за моите силни страни и како можам позитивно да влијаам на другите. Стекнав поголема самодоверба во јавното говорење и соработката со луѓе од различни личности. Дефинитивно би ја препорачал оваа програма на секој млад човек кој сака да расте како индивидуа и лидер – особено на оние кои се заинтересирани за тимска работа, водење проекти или градење позитивни односи во заедницата. Емилија Илиевска Сакав да стекнам нови вештини во лидерство, тимска работа и организација на активности, но и да се поврзам со луѓе од различни земји и култури. Она што најмногу ми се допадна беше практичниот дел – тимски задачи, симулации и интерактивни вежби. Атмосферата беше позитивна, а размената на искуства со другите учесници беше навистина инспиративна. Научив многу работи, како на пример како ефикасно да комуницирам, да се чувствувам посигурно зборувајќи странски јазик, да се справувам со конфликти и да останам флексибилна во различни ситуации. Обуката ми помогна да станам посамоуверена во мојата улога како лидер и да развијам разни вештини што можам да ги применам и во други проекти и во секојдневниот живот. Некои од работилниците планирам да ги користам во младинската организација на моето училиште. Ова искуство е особено вредно за младите луѓе кои сакаат да растат како лидери, особено оние кои сакаат да работат со млади или во неформално образование. Мануела Спасевска Кога слушнав за овој настан, бев возбудена бидејќи моето претходно искуство беше незаборавно, спонтано и прекрасно. Имав големи очекувања бидејќи последниот камп на кој присуствував во Данска беше неверојатно добар. Сепак, овој беше одличен на свој начин. Знаев дека секој камп е различен и дека некои искуства се случуваат само еднаш, на одредено место. Убавината на настанот лежи во тоа чувство – дневните сесии беа полни со интеракција, комуникација и личен раст. Преку игри и тимски работилници, создадовме шестдневно семејство. Освен што учев за пријателството, емпатијата и создавање топла атмосфера каде што секој се чувствува безбедно и храбро, научив и за тимска работа, создавање безбедна средина, организирање кампови за различни возрасни групи, видови комуникација и работа со деца. Сите овие професионални и лични вештини се работи што ќе ги понесеме назад и ќе ги примениме во нашата работа во ИМКА. Во прилог се фотографии од ова незаборавно искуство на нашите млади лидери.
Бевме домаќини на иницијативата за Западен Балкан 2025
Последни новости Бевме домаќини на иницијативата за Западен Балкан 2025 Од 22 до 25 септември 2025 година, ја имавме честа да бидеме домаќин на овогодинешниот координативен состанок на Иницијативата за Западен Балкан на ИМКА. Овој настан ги обединува енергијата, знаењето и визијата на лидерите од регионов и пошироко. На собирот учествуваа претставници од ИМКА од Македонија, Србија, Косово, Грција, Бугарија, Италија, Албанија, како и претставници од нашите партнери од ИМКА од Германија и САД. Покрај тоа, беше посебна чест и доказ за важноста на оваа иницијатива за развојот на мрежата на ИМКА во регионот да бидат генералните секретари од Светската ИМКА, Карлос Санви и ИМКА Европа, Хуан Симоес Иглесијас, како специјални гости. Заедничка визија и соработка Регионалниот состанок се фокусираше на зајакнување на локалните и националните организации на ИМКА преку: Размена на добри практики во младинската работа Продлабочување на соработката меѓу земјите во регионот Развивање на стратешки план до 2030 година, во согласност со глобалната #YMCAVision2030 Обука и дискусии за одговорно управување, финансиска транспарентност и одржливо финансирање на младинските програми. Овие теми се во срцето на глобалната мисија на ИМКА – организација со повеќе од 180 години историја посветена на холистичкиот развој на младите луѓе и градењето посилни заедници. Учење, споделување, растење Преку предавања, работилници и дискусии, учесниците имаа можност да дознаат за современите предизвици со кои се соочуваат младите луѓе, да слушнат инспиративни искуства од САД, Германија, Италија, Грција и поширокиот регион и да придонесат за создавање заедничка рамка за идниот развој на ИМКА во Западен Балкан. Посебно внимание беше посветено на теми како што се лидерство, кампување како алатка за неформално образование и културна размена за градење мостови на мир, разбирање и можности за младите. Адријана Становичи и Скот Т. Џексон од ИМКА на САД водеа инспиративна работилница за магијата на камповите. Клаудија Кун од ИМКА Германија, која постојано ја поддржува Иницијативата за Западен Балкан во нејзиното патување за раст, водеше сесија за градење капацитети носејќи ги позитивните практики од Германија. Покрај тоа, имавме сесии за најновите позитивни приказни од Грција и Италија. Благодарност и признание Зад секој успешен настан стои посветен тим и волонтери, без кои ништо од ова не би било можно. Посебна благодарност до тимот на YMCA.mk и волонтерите: Емилија, Јован, Никола, Антонио, Мила, Мануела, Јована, Стефанија и Мики, за нивниот ентузијазам, поддршка и гостопримство. Како дел од глобалното семејство на YMCA, нашата организација гордо придонесува за градење на помирен, поврзан и посилен Западен Балкан со млади луѓе во срцето на секоја промена.
Сведоштва за кариерно насочување со ПрофилПАСС
Почетна Кои сме Мисија, Визија, Вредности Запознајте го тимот Управување Историја за ИМКА Што работиме Програми Новости Вклучи се Партнерства Контакт MK MK EN X Донирај Последни новости Сведоштва за кариерно насочување со ПрофилПАСС Ана, Студент на Факултет Отсекогаш сум сакала да се откривам себеси, па со тоа, пополнувањето на прашалници, како и решавањето на психолошки тестови и квизови за себеспознавање, кај мене будело љубопитност и интерес. Со Профил Пас кариерното советување бев пријатно изненадена од уникатното искуство кое го стекнав и различниот пристап од останатите испитувања на кои сум била изложена порано. Тоа ми овозможи додатно да се спознаам себеси, да се соочам со моите доблести и недостатоци за да научам како да се справувам со нив. Исто така открив кои се останатите категории/типови на луѓе и како тие функционираат и сега применувам здрава комуникација со нив, зависно од нивниот карактер.Дефинитивно ваквиот начин на самопроверка е уникатен сам по себе и имам чувство дека ми даде најпрецизни и најрелевантни резултати. Би го препорачала посебно на оние кои чувствуваат некаква криза во идентитетот, не знаат кој кариерен пат да го одберат или чувствуваат дека не се среќни во својата работа. Исто така треба да се примени и кај средношколците, бидејќи во нивна возраст се доволно зрели да разберат и тогаш им е најпотребно да се спознаат себеси за да знаат по кој пат да се движат. Ангела, средношколка Додека учествував во процесот се чувствував слободно да го споделам она што сакам да го изразам за себе и добив уверување дека преку овој метод ќе добијам насока што ќе ми одговара, а во исто време ќе можам да научам нешто ново за себе. Бидејќи имав сесии еден на еден, се чувствував слободно и без стрес. Најпријатниот дел од активноста беше приватноста што ја имав додека учествував. Научив за себе дека сум алтруистичка личност која има големи аналитички и инженерски способности и преку состаноците добив насока како понатаму да се изградувам како личност. Со оглед на тоа што немав конкретна идеја што да правам понатаму кога започнав со мојот кариерен живот, активноста особено ми помогна да можам да истражувам и да одлучам кои работни места ќе ми одговараат според моите искуства и способности.Верувам дека не би можела сама да го направам тоа со еднаква ефикасност доколку не учествував во Профил Пас кариерното советување. Добив и насоки за тоа кои работни места да ги истражувам врз основа на моите искуства, вештини и интереси и како да го збогатам моето CV, работи кои ќе ги применувам во текот на мојот живот. Порано имав голем стрес бидејќи верував дека нема сигурен кариерен пат за мене и не бев сигурна дали некогаш ќе се вработам во иднина. Преку оваа активност научив дека постои таков и секој има сигурен пат во кариерата и јас можам да го најдам мојот пат. Ова беше многу корисно за мене и верувам дека ќе биде од голема помош и за оние околу мене.Мислам дека оваа методологија ќе им користи на најмладите во средното образование кои сè уште не се сигурни што понатаму по средното образование, на пример, на кој универзитет да одат кога ќе станат полнолетни. Мислам дека има толку многу млади луѓе несигурни во себе и без идеи за нивниот иден професионален живот и оваа активност би им била од голема корист. Наташа, младински работник Кога првпат дознав за кариетното советување Профил Пас, бев љубопитна, но не и премногу оптимистка. Ме потсети на минатите искуства во средно училиште кога работевме со психолози за да разговараме за нашите идни образовни патишта. Моите очекувања беа скромни, но сепак решив да му дадам шанса. Сфатив дека иако работев речиси една деценија, ангажирањето во саморефлексија и разбирањето на моите лични и професионални афинитети сè уште може да биде вредно.Процесот поттикна искреност и отвореност од моја страна, што ми овозможи длабоко да размислувам за моите квалитети и искуства од минатото. Имаше моменти кога ми требаше дополнително време да се потсетам на одредени детали, но тоа само го направи процесот позначаен. И покрај моето долгогодишно искуство како младински работник, волонтер и координатор на волонтери, открив нови сознанија за себе. Оваа активност ми помогна да ги потврдам моите силни страни, да ги препознаам областите за раст и да се чувствувам посигурна во мојата кариера.Генерално, сметам дека ова искуство беше корисно за мене. Тоа не само што ја подобри мојата самосвест, туку ми даде и практични алатки, како детален документ кој ги сумира моите резултати, кои можам да ги користам за личен и професионален развој. Би го препорачала Профил Пас кариерното советување на средношколците кои се подготвуваат за факултет или на млади луѓе кои не се сигурни за насоката на нивната кариера. Андреа, средношколка На почетокот немав некои големи очекувања, но се чувствував како навистина да ми треба оваа активност. Оваа активност не само што ме натера да се запознаам себеси, туку ми овозможи да ги осознам сите мои способности, вештини и особини, мојот карактер што навистина ми помогна, како во личниот, така и во професионалниот развој. На пример, после оваа активност постепено забележав колку ми беше полесно да формирам нови соработки и познанства и да пристапувам до нови искуства. Профил Пас кариерното советување го препорачувам на сите, но особено на младите кои не се познаваат доволно и верувам дека ќе им помогне како што мене ми помогна мене. Лука, средношколец На некој начин научив повеќе за себе и беше интересно, но најмногу ми се допадна делот кога се консултирав со психологот за мојот живот, бидејќи бев отворен и искрен, исто така и за моите интереси за иднината, како важна дел за секој млад човек. Не можам да потврдам за професионален раст, бидејќи се уште сум млад, но знам дека сигурно ќе ми биде од корист. Тие се однесуваат на секојдневниот живот, како што е подигнувањето на самодовербата кај младите и затоа разговорите со психолог на овие теми се многу корисни за почеток. Профил Пас кариерното советување им ја препорачувам на младите кои сакаат подобро да се запознаат себеси, да откријат во што се добри и што сакаат да работат и прават во иднина. Генерално, ова беше
Впечаток што трае – Фестивалот „Wonderful Days“ 2025 низ очите на нашите млади
Последни новости Впечаток што трае – Фестивалот „Wonderful Days“ 2025 низ очите на нашите млади Во јули 2025 година, осум претставници од нашата ИМКА – двајца лидери и шест млади на возраст од 13 до 18 години – беа дел од незаборавниот младински фестивал Wonderful Days во Данска. Овој уникатен камп-фестивал организиран од ИМКА Данска секои две години претставува вистинска авантура на отворено исполнета со концерти, работилници, спортски активности, моменти за лична рефлексија и многу нови пријателства. Благодарение на поддршката од програмата Еразмус+, македонските учесници имаа шанса да бидат дел од овој настан заедно со млади од неколку други европски земји. Wonderful Days не е обичен фестивал – тоа е заедничко доживување што инспирира, обединува и охрабрува млади луѓе преку неформално образование, волонтеризам и забавни активности. Нашите учесници се вратија полни со нови идеи, вештини и мотивација, подготвени да пренесат дел од фестивалскиот дух и кај нас. Во продолжение ви ги пренесуваме нивните лични впечатоци – искрени, живописни и полни со благодарност. МихаилМоите први мисли кога дознав за фестивалот во Данска беа дека оваа ќе биде незаборавно. Мислам дека сите имавме некои очекувања, но тоа јас што го очекував, испадна реалност, рај за млади. Се чувствував прифатен и бев многу среќен дека сите беа дружељубиви и комуникативни. Аспектот за интернационални запознавања ми беше многу пријатен – споделувавме наши култури и игри. Научив да бидам комуникативен и да уживам во природата. Активностите кои ги имавме на огнот ми влијаеа позитивно – учев како да правам прибор за јадење од дрво и секакви други скулптури. Целокупно искуство би го опишал незаборавно, екстремно забавно и незаборавно за кој и да оди во иднина. ТеонаЗатоа што кај нас не постојат вакви настани почетната помисла ми беше дека ова е нешто невозможно за мене, но сепак со мала надеж се пријавив. Се чувствував возбудливо со мала доза на страв дали ќе ги успеам, но на ова место ништо не е невозможно и тука секој ти дава надеж и сила дека се можеш. Стекнав нови искуства поради тоа што прв пат кампував. Се запознав подобро и себе си. После секоја активност се чувствував посилно од тоа што верував дека сум. Првенствено научив да живеам поедноставно од она што го живеам во секојдневниот живот. Научив да бидам поснаодлива, научив дека вредам, дека луѓето ги интересира моето мислење. Би го препорачала овој фестивал и на многу други млади зашто се учат првенствено многу работи кои понатаму помагаат за секојдневниот живот и за личен раст. СтефанијаПред заминувањето, очекував нешто помалку, но беше предобро, а и местото беше супер, чисто и средено. За време на сите активности се чувствував предобро и прифатено од страна на сите. Преку учеството на овој фестивал стекнав нови вештини, подобра комуникација со другите и дисциплина. Порано се двоумев дали да се вклучам во нови активности. Сега сум поотворена за предизвици и стекнав нови пријателства што исто така ми значи многу. Овие типови на едукација би ги препорачала. Затоа што учиш како да работиш тимски, стекнуваш нови знаења и дисциплина што е најважно. Фестивалот беше предобро организиран и сакам да му препорачам на секој што има шанса да ја искористи. ЕмилијаОд моментот кога разбрав за фестивалот бев пресреќна и возбудена за оваа авантура бидејќи никогаш претходно не сум имала такво искуство. На фестивалот научив за тимска работа, научив како да бидам повеќе одговорна, а исто така и развив многу други вештини како и креативност и отпорност на предизвици. На кампот научив многу работи кои ќе ги користам и понатаму во секојдневниот живот како флексибилност и решавање на проблеми и изнаоѓање креативни решенија. Исто така научив како да го искористам целиот ден и да се чувствувам исполнето. Препорака: Мислам дека во следните шест месеци нема да престанам да му раскажувам на сите како си поминав, бидејќи беше едно незаборавно и презабавно искуство. Му препорачувам на секој да учествува доколку има ваква прилика бидејќи никој не те учи вакви работи кои ќе ги научиш на кампот: пријателството, вештините, искуството и сеќавањата. Целокупно искуство: Би го опишала ова искуство со еден збор – неверојатно. ЈованаИскрено не мислев дека ќе имам толку среќа за да бидам дел од една ваква авантура и немав никакви очекувања, но кога дознав дека ќе учествувам на кампот знаев дека ќе си поминам преубаво, дека ќе запознам нови пријатели, дека ќе научам нешто ново. Најпривлечни активности ми беа активностите кои можевме да ги правиме во слободно време како: плетење, шиење, работа со глина, изработка на белегзии. Учеството во еден ваков организиран камп фестивал значи да имаш вистинска можност да учиш многу нови нешта каде се наоѓаш во друга околина и запознаваш различни личности. Работите кои ги учиш во овие активности на кампови се применливи и корисни во секојдневниот живот. Овие активности на кампови, овие дружења, спомени, искуства им ги препорачувам на секој млад човек затоа што почнува да станува посвесен, посамоуверен, стекнува нови пријателства и станува по храбар. МануелаНе можев баш да замислам како би изгледал камп фестивал затоа што прв пат учествував на ваков настан. Фактот што сите кои беа во мојата група веќе ги познавав значеше дека единствено очекување ми беше да имам прекрасна дружба! Секоја игра беше нова за нас и направена за да не вклучи. Така успеав да уживам во секоја поединечна активност која ни се нуди, вклучувајќи дури и еден најобичен разговор со некој од интернационалците. Сето тоа беше можност за личен развој. Во овој 21 век сите се со мисла дека треба да изгледаат совршено, да се однесуваат совршено, да немаат мани, да се трудат да бидат најдобри, да се натпреваруваат меѓусебно и да се трудат најмногу за своите социјални мрежи. Но на камп, се сеќаваме на вистинските стандарди, на она што е навистина важно. На добрината, на пријателството, на хуманоста, на лојалноста и на љубовта! Веруваме дека ваквите доживувања на Wonderful Days оставаат трајни впечатоци и ги охрабруваат младите да бидат поактивни, посамоуверени и поотворени кон светот околу себе. Гордана – групен лидерКога првпат слушнав за летниот камп во Данска, почувствував возбуда и љубопитност. Веднаш ми се виде како одлична можност за нови искуства, запознавање нови луѓе
Повеќе од камп: Приказни што остануваат со вас
Последни новости Повеќе од камп: Приказни што остануваат со вас Сведоштва на ученици на кампот Ова лето, група девојки од различни училишта и позадини се собраа во кампот GLOW – и си заминаа со повеќе од само прекрасни спомени. Она што започна како забавна летна можност брзо се претвори во искуство што го менува животот, полно со личен раст, нови пријателства, смеа и учење што стигна далеку подалеку од камповите. Михаела, 15-годишна ученичка по медицина, кампот стана место за градење самодоверба и учење како подобро да комуницираат со другите. „Сè што научивме е нешто што можеме да го користиме во секојдневниот живот – а пријателствата сè уште остануваат.“ Ема, 14, пристигна нервозна, но надежна – и си замина со полно срце. Таа го опиша кампот како забавен, едукативен и длабоко овластувачки. „Научив да зборувам пред други без да бидам срамежлива“, рече таа. „Станав подобра во работата во тим, стекнав пријатели и станав посигурна.“ Ана Марија, исто така 15, сметаше дека овие активности треба да ги доживеат сите тинејџери – дури и возрасните. Кампот ја научи на практични и емоционални лекции кои, како што рече, „го променија нејзиниот секојдневен живот“. Таа верува дека овој вид камп е особено важен за помладите генерации да се исклучат од своите телефони и да се поврзат повеќе со луѓето. Емилија, 16, го нарече своето искуство со GLOW „неверојатно“. Таа не пронајде само радост во моментот, туку и алатки за живот – учење на вредноста на отпорноста, лидерството и како вистинската сила лежи во единството и поддршката. „Никој не ве учи на овие работи на начинот на кој тоа го прави кампот“, рече таа. „Пријателствата, вештините, спомените – тие остануваат со вас“. Ангела, 14, ја прифати секоја активност – од поставување шатор за прв пат до учење како да се изрази со поголема самодоверба. „Од кампот, почнав подобро да се грижам за себе и повеќе да зборувам“, сподели таа. „Ми помогна да се отворам и да работам во тим“. За Јана, 15, магијата беше во енергијата. „Беше забавно, едукативно и ми помогна да бидам поотворена“, рече таа. Особено уживаше во игрите со вода, тимската работа и чувството на учење преку играње. Овие девојки дојдоа во кампот GLOW барајќи нешто ново. Тие си заминаа со нови вештини, нови пријателства и посилно чувство за тоа кои се – и кои можат да станат. Сведоштва од персоналот „Навистина го ценам тоа што бев дел од првиот пат од враќањето на кампот. Од тука е само нагоре. Ви благодарам многу!“ – Лизи Бредшо, волонтерка на Мировниот корпус „Особено со кампот GLOW, имаше ентузијазам и возбуда за учество. Беше јасно дека се воспоставени значајни врски. Цел тим работеа навистина добро заедно и имаа јасни можности за развој на програмата следната година!“ — Шејна Мелцер, волонтерка на Мировниот корпус „Ова беше предизвик за мене, бидејќи тоа беше прв пат директно да бидам вклучена во планирањето кампови на отворено, работејќи со тим од САД кои имаат богато и реално искуство зад себе. Секако, секогаш има простор за подобрување и со нетрпение очекувам повеќе вакви или слични активности во иднина.“ — Наташа Дарков, персонал на YMCA „Девојките се забавуваа прекрасно, што е главната цел. Навистина сум среќна што камповите повторно се одржуваат и едвај чекам да видам како можам да придонесам за да се вратат во нивната поранешна слава! Со Божја помош!“ — Роберта Петровска, локална волонтерка Анкета за камперите По учеството во кампот, многу девојки се чувствуваат значително посигурни во своите способности за донесување одлуки (72% високо ниво на согласност) и посветени на исполнување на своите обврски (67%). Повеќето учеснички изјавија дека се посвесни и проактивни во грижата за своето физичко и емоционално здравје (78%), како и дека имаат значително зголемување на самодовербата, безбедноста и независноста (67%). Многу од нив се чувствуваат поефикасни во тимската работа (78%), нивната способност за соработка со другите е подобрена (78%), а тие се исто така поподготвени да ги стават целите на групата пред своите (72%). Исто така, 72% повеќе ги ценат и ги разгледуваат различните мислења и подобро ја разбираат групната динамика. Учесниците покажаа зголемен интерес за истражување нови искуства (89%) и голема подготвеност да излезат од својата зона на удобност и да пробаат нови работи (85%). Тие се чувствуваат посигурно кога се среќаваат и комуницираат со нови луѓе (79%) и поефикасно работат во група (85%). Анкета на родители на учесници За подобро да го разбереме влијанието на овогодинешниот камп GLOW, ги замоливме родителите на учесниците да ги споделат своите впечатоци. Нивните одговори покажаа не само силно задоволство од искуството, туку и видливи промени кај нивните ќерки по завршувањето на кампот. Сите родители се согласија дека кампот бил корисен за нивните ќерки – јасен знак дека GLOW продолжува да нуди значајна содржина и поддржувачка средина. Кога станува збор за целокупното искуство во кампот, големо мнозинство родители го оценија како одлично, а останатите рекоа дека е над просекот или просечно. Активностите исто така добија високи пофалби, при што повеќето од нив ги опишаа како одлични, а малкумина како многу добри. Еден од нај охрабрувачките резултати дојде од прашањето за промените кај децата по кампот. Повеќето родители рекоа дека виделе позитивна разлика – нивните ќерки се вратија дома посреќни, посигурни, покреативни и по социјално ангажирани. Неколкумина забележаа дека се смеат повеќе, иницираат разговори или се изразуваат на нови начини, а неколкумина сè уште не беа сигурни или не видоа забележителна промена. Повеќето родители сметаа дека кампот ги исполнил нивните очекувања и кога биле прашани како GLOW се споредува со другите кампови во земјата, половина рекле дека е меѓу најдобрите, додека други немале точка за споредба. Родителите го опишаа GLOW како безбеден простор каде што девојчињата можат да се изразат, да пробаат нови работи и да растат – емоционално, социјално и креативно. Многумина изразија благодарност што постои таква програма и се надеваат дека ќе ја видат како продолжува и во наредните години.
Лето со смисла: Камповите на ИМКА се вратија со визија и нов ентузијазам
Последни новости Лето со смисла: Камповите на ИМКА се вратија со визија и нов ентузијазам ИМКА гордо ја оживеа својата традиција на младински кампови, прилагодувајќи се на времето со дневни кампови фокусирани на личен раст, тимска работа и учење на отворено. Овогодишните кампови, Младинскиот лидерски камп за момчиња (Young Men’s Leadership Project – YMLP) и Девојките го водат нашиот свет (Girls Leading Our World – GLOW), им понудија на младите луѓе од 8-9 одделение во основно училиште и 1-3 во средно училиште уникатна можност за летна авантура, учење и пријателство. Повторно разгорување на духот на кампот: Лето на раст, лидерство и радост Повикот за учесници ги покани младите да се тргнат од екраните и секојдневните рутини, да се потопат во природата и во атмосфера посветена на инвестирање во лидерство, комуникација, животна средина и личен раст. „Нашите кампови се безбедна, забавна и инспиративна средина“, се нагласува во повикот, „каде младите луѓе стануваат посигурни, посвесни и подготвени за живот“. За да се подготви просторот за непречен и привлечен камп, волонтерите од ИМКА учествуваа во акции за чистење во дворот на Педагошкиот факултет како примарно место за активностите на камповите, обезбедувајќи пријатна средина за сите учесници. Исто така се одржа информативна сесија за да се претстават камповите и да се поттикне ентузијазмот кај заинтересираните млади и нивните родители. Лидери во подем, ден по ден: камповите ИМЛП и ГЛОУ на ИМКА Дневниот камп за момчиња YMLP се одржа на 20 јуни, фокусирајќи се на вежби дизајнирани за да поттикнат личен раст. Активностите вклучуваа круг на тапани што учи на комуникација и активно слушање – метафора за хармонија и соработка во секојдневниот живот и вежби на слеклајн што симболизираат рамнотежа, доверба и меѓусебна поддршка. Учесниците, исто така, вежбаа Чи Гонг, древна кинеска практика на внимателност и движење, подобрувајќи ја физичката и менталната благосостојба. Игри за раздвижување и социјални игри и моменти на релаксација поставувајќи значаен тон за патувањето на младите ги надополнија овие активности. Од 26 до 28 јуни, кампот GLOW им посака добредојде на ентузијастична група девојки за тридневно возбудливо искуство. Првите два дена беа одржани во мирниот двор на Педагошкиот факултет, додека последниот ден беше поминат меѓу прекрасната природна убавина на Националниот парк Пелистер. Секој ден започнуваше со јога сесии кои им помагаа на учесниците да се заземјат и длабоко да се поврзат со своите тела и околината. Основната филозофија на кампот го поттикнуваше учењето преку искуство и тимска работа: девојките вежбаа слушање, комуникација и градење доверба преку различни практични вежби. Дневните тимски предизвици ги поттикнаа учесниците да соработуваат на стратегија и решавање проблеми, зајакнувајќи ги основните животни вештини како што се отпорност, лидерство и одговорност за заедницата. Активности како што е слеклајн ја тестираа рамнотежата, координацијата и храброста, нудејќи лекции за соочување со стравови и потпирање на другите што само кампот може навистина да ги обезбеди. Попладневните часови го префрлија фокусот од физички на рефлективни активности, вклучувајќи сесии за внатрешно изразување преку цртање и практики на внимателност. Овие моменти им овозможија на учесничките да забават и да ја вратат личната благосостојба во еден брз свет. Водните игри, омилени во кампот, додадоа забава и спонтаност, создавајќи радосни и незаборавни летни спомени. Уникатен белег беше симулациската вежба за локална заедница каде што девојките играа улоги на локални засегнати страни за да дебатираат, да идентификуваат проблеми во заедницата и да предложат решенија – оспособувајќи ги да разберат и да учествуваат во процесите на донесување одлуки што влијаат на нивните животи и заедницата. Срцето на кампот: Волонтерство и тимска работа Зад оваа програма стоеше посветен тим. Тимот на ИМКА тесно соработуваше со локални волонтери кои придонесоа за логистиката и маркетингот како и со волонтерите на Мировниот Корпус кои служат низ целата земја и кои го додадоа вкусот и клучната состојка од американскиот стил на кампови. Тие помогнаа во имплементацијата на програмата преку повеќе вежби, игри и камперски песни, служејќи и како инструктори, поттикнувајќи ја тимската работа. Персоналот на кампот беше посветен во обезбедувањето висококвалитетна, значајна програма, но исто така и во поттикнувањето на поддржувачка и инспиративна атмосфера каде што секој млад човек може да напредува. Во знак на благодарност ИМКА изразува најдлабока благодарност до локалните волонтери и волонтерите на Мировниот Корпус за нивната посветеност и страст што ни помогна да го разгориме пламенот на кампувањето кај нашите млади во заедницата. Многу сме среќни што имаме партнери како што се ИМКА од САД, Signs of Hope од Германија и нашите колеги од ИМКА на Балканот со кои работиме на проектот Head Space, овозможувајќи многу од сесиите, опремата и логистиката, не само за овие дневни кампови, туку и за понатамошни активности. Си ги сакаме нашите донатори. Благодарност до сите што веруваа во нас, што ја делат нашата мисија и вредности, инвестирајќи во младите луѓе и донирајќи во нашата кампања за собирање средства со што учеството на нашите млади стана достапно за сите. Заедно и со нетрпение очекуваме да го продолжиме ова патување на раст, учење и оспособување во текот на многуте лета што доаѓаат.
Сведоштва од врсничката школа за ученици од основните училишта
Последни новости Сведоштва од врсничката школа за ученици од основните училишта Јована Георгиевска, училиште Д-р. Трифун Пановски Од сите теми, “Како да се справиме со врсничко насилство” беше моја омилена тема за презентирање бидејќи ние ги поучувавме децата како да се спротивстават и да создадат своја самодоверба. Во иднина, би сакала повторно да сум врснички едукатор бидејќи сметам дека ова е важна тема на која и треба да се зборува не само на час, бидејќи секојдневно ја гледаме но многумина не прават ништо да ја спречат. Фуркан Метлику, училиште Гоце Делчев Со помош на предавачите и работилниците станав посамоуверен и подготвен да зборувам пред други. Најмногу ме заинтересира темата за психичко насилство, затоа што тоа често се случува, а тешко се препознава. На презентациите пред учениците ме радуваше тоа што учениците слушаа внимателно и покажаа интерес. Верувам дека научија нешто важно. Би сакал повторно да бидам врснички едукатор, затоа што ова искуство ми помогна да се изразувам подобро, да стекнам самодоверба и да бидам поддршка за другите. Мерт Рустемов, училиште Даме Груев Да бидам врснички едукатор за спречување на насилство за мене беше голема одговорност, но и можност да научам нешто ново и да помогнам на другите. Преку работилниците и обуките добив самодоверба и се чувствував подготвен да зборувам пред други ученици. Темата за врсничкото насилство ја сметам за многу важна, бидејќи секој од нас има право да биде безбеден и почитуван во училиштето. Најинтересно ми беше кога преку игри и дискусии научивме како да препознаеме различни видови насилство и како правилно да реагираме. Се чувствував најмногу возбуден кога требаше да зборувам пред другите ученици, но со текот на времето сфатив дека нема место за срам и страв – важно е да се зборува отворено. Сметам дека ваквите активности се исклучително важни и би сакал повторно да бидам врснички едукатор. Чувството дека можам да направам промена, дури и мала, ми дава сила да продолжам. Јован Гроздановски, училиште Коле Канински Кога слушнав за оваа работилница јас имав трема за запознавање со нови деца, но со секоја нова работилница јас се опуштив се повеќе и повеќе. Пред да презентирам во моето училиште како врснички едукатор, јас имав страв, но за време на презентацијата јас се опуштив. Нешто што ми помогна да се опуштам се децата кои учествуваа на работилницата, бидејќи тие беа отворени и споделуваа свои искуства со врснички насилство и како тие се справуваа со тоа. Јана Лозанче, училиште Св. Кирил и Методиј Работилниците ни помогнаа да се поврземе меѓу себе, да изградиме тимска доверба и да се чувствуваме сигурно кога зборуваме пред други ученици. Најинтересен дел ми беше кога учениците споделуваа искуства за насилство што го преживеале или го виделе. Тоа беше момент кога навистина почувствував колку оваа тема е сериозна и важна. Во тие моменти научив дека секое дете крие приказна зад своето однесување и дека треба да бидеме тука едни за други. Најтежок дел ми беше подготовката за презентацијата. Иако бевме подготвени и имавме поддршка сепак имав трема и се прашував дали ќе кажам се како што треба. Но, кога видов дека децата навистина слушаат почувствував дека навистина правиме нешто добро. Би сакала повторно да бидам дел од вакви активности, дури и да бидам повторно врснички едукатор.
