Сведоштва на учесници на клубот за дигиталното образование

Последни новости Сведоштва на учесници на клубот за дигиталното образование Стефанија Моето име е Стефанија и сум средношколка во средното училиште САБА во Битола. Имам 16 години и учам на смерот по информатика. Денес го завршив часот “Вовед во дигитални бизнис вештини” од курсот за претприемништво. Курсевите од HP life постепено ги изучувам веќе една година. Иако сум настроена да учам за технологија и нејзините пронајдоци, многу пати се наоѓам себе си каде се најавувам на HP и одам на курсот за претприемништво или маркетинг. Едноставно, ги обожувам тие курсеви оти се брзи, лесни за разбирање и ме учат за нешта што до пред тоа не сум ги слушнала. Михаил Јас се викам Михаил Спасевски и доаѓам од гимназијата Таки Даскало. Одам на курсеви веќе еден месец и да кажам дека сум задоволен од курсевите е потценување. Неодамна го завршив часот „Социјално претприемништво“, кој ме научи како да проценам идеја за социјално претпријатие, како да користам анализа на засегнатите страни и како да го измерам деловното влијание. Најмногу изучувам часови во курсот за Претприемништво. Сметам дека овој курс е најкорисен за секојдневна употреба и во мојата работа. Тие не се премногу долги, обично ми треба до еден час да ги завршам, а споделените информации што ги има во овие курсеви се одлични. Ми се допаѓа идејата за онлајн курсеви; сметам дека полесно се разбираат и учат. Ако сакате можете да се вратите на курсот и повторно да го посетите. Целокупниот квалитет на овие курсеви е неверојатен, и јас не би променил ниту една работа кај нив. Ирем Јас сум Ирем Емектар, студентка на Одделот за комуникации и дизајн на Универзитетот Ондокуз Мајис во Турција. По потекло сум од Анкара, но моментално сум на двомесечно волонтирање во Младинскиот центар во Битола. Покрај моето универзитетско образование, имам голем интерес за развојот на дигиталниот свет. Затоа, имам за цел да ги развијам моите знаења и вештини за дигитален маркетинг преку посетување курсеви на ИМКА поддржани од HP Life. Верувам дека иднината на комуникацијата и дизајнот ќе биде обликувана од дигиталната трансформација. Овие курсеви придонесуваат и за мојот професионален и за мојот личен развој. Им препорачувам на сите млади луѓе да ја искористат оваа бесплатна можност, бидејќи дигиталниот центар на ИМКА нуди инспиративна средина за секој што сака да учи и да се усовршува. Јован Јас сум Јован од Битола, редовен волонтер на ИМКА. Последната година од моето основно образование, активно се посветив на курсевите од HP life кои скоро секоја недела се одржуваа во Младинскиот центар. Од самиот почеток имав чувство дека ќе го надополнат моето досегашно знаење. Откако завршив неколку курсеви се заинтересирав уште повеќе. Имав можност да бидам дел и од првата генерација на учесници на HP Gaming Garage, каде изучив курс за „Дизајнирање на компјутерски игри“. Преку одржувањето на нив ме привлече и комуникацијата и интеракцијата со другите ученици кои редовно идеа. Овој начин на добивање на нови знаења го препорачувам на моите соученици и слободно да ја изучат мојата омилена тема, дигитален маркетинг.

Автентични приказни, вистински раст: гласовите на учесниците од Врсничката школа

Последни новости Автентични приказни, вистински раст: гласовите на учесниците од Врсничката школа Мила Николовски, Економско училиште Јане Сандански Кога првпат слушнав за оваа активност, веднаш почувствував голема љубопитност и возбуда. Имав позитивни очекувања – дека ќе научам нешто ново, ќе запознаам интересни луѓе и ќе стекнам корисни знаења и искуства. Најмногу ми се допадна тимската работа и практичните задачи, кои беа динамични и забавни. Преку нив научив нови вештини за комуникација, соработка и критичко размислување, а истовремено добив поголема самодоверба во изразувањето на моите идеи. Ова искуство ми помогна да се развивам како личност, да ги подобрам моите социјални и организациски способности и да добијам појасна претстава за моите идни цели. Стекнатите знаења можам да ги применам во секојдневната комуникација, во училиштето, како и при работа во тим и носење одлуки во различни ситуации. А најмногу корист од вакви активности би имале младите кои сакаат да се надградуваат и да стекнат нови искуства. Секако би ги препорачала ваквите програми на сите, бидејќи придонесуваат за личен развој и практично знаење. Сара Груевска, Економско училиште Јане Сандански Во школата дојдов со очекувања дека ќе си поминам убаво и дека ќе научам многу нови и корисни работи, а тие очекувања целосно се остварија. Работилниците беа особено интересни и интерактивни, а преку нив стекнав нови знаења и сознанија што претходно не ги поседував. Ова искуство ме научи на вистинските вредности и значително придонесе за мојот личен раст и самоусовршување. Сметам дека работите што ги учевме се целосно применливи во секојдневниот живот и ни помагаат подобро да се справуваме со различни ситуации. Најголема корист имаме ние, учесниците, бидејќи преку активностите учиме практични вештини кои ни се неопходни во секојдневието. Нектарија Илиевска, Гимназија САБА Искрено, школата ги исполни, па дури и ги надмина моите очекувања. Најмногу ми се допаднаа активностите и игрите, бидејќи преку нив учењето беше интересно, активно и забавно. За време на школата научив многу нови работи и стекнав нови знаења и вештини што ќе ми бидат корисни понатаму. Сметам дека тоа што го учевме е практично и применливо во реалниот живот, а мислам дека ваков тип школа е најкорисен токму за средношколци. Стефанија Димитријовска, Гимназија САБА Пред почетокот на школата имав очекувања да дознаам повеќе информации поврзани со светот на кариерниот развој. Најинтересен дел од програмата за мене беа игрите во кои активно учествувавме и постојано бевме во движење. Преку нив научив нови игри и начини на соработка со другите. Сметам дека школата делумно, но значајно, ми придонесе во оваа област и ми даде појасна слика за темата. Работите што ги учевме се применливи во секојдневниот живот и можат да бидат од голема корист за ученици од седмо, осмо и деветто одделение, како и за ученици од прва, втора и трета година средно образование.

Нашите млади во Европскиот камп за лидери во Холандија

Последни новости Нашите млади во Европскиот камп за лидери во Холандија Шест млади луѓе од нашата ИМКА учествуваа на Европскиот летен камп за млади лидери (ESYL) – меѓународна обука одржана во Омен, Холандија, организирана од ИМКА Холандија. Овој уникатен настан, кој стана прекрасна традиција што ги обединува младите лидери од цела Европа, оваа година собра учесници од Холандија, Германија, Франција, Обединетото Кралство, Украина, Португалија, Чешка, Македонија и други земји. Заедно, тие учеа, споделуваа идеи и градеа пријателства што ќе ги обликуваат камповите на утрешнината. Преку четиридневна програма исполнета со интерактивни работилници, тимска работа и практични сесии, учесниците научија за организација на летни кампови, лидерство, комуникација, тимска работа, безбедност, етичкото однесување и традициите на кампот. Секако, имаше и многу игри, логорски оган и моменти полни со вистински камперски дух. Нашата ИМКА е долгогодишен партнер на ИМКА Холандија речиси една деценија и активно учествува во оваа програма од 2015 година, подготвувајќи нови генерации млади луѓе кои ќе ги водат летните кампови на иднината низ цела Европа. Подолу се дадени размислувања од нашите шест учесници – нивните впечатоци, искуства и инспирации од ESYL 2025.   Никола Гелов Пристигнувањето во Омен – малото гратче што ќе ми остане врежано во срцето – беше едноставно прекрасно! Бидејќи нашето патување беше најдолго, нашата група пристигна последна. Се сместивме во нашите соби и од тој момент започна она што би го нарекол целосна поврзаност! Запознавање нови луѓе, размена на мисли, многу смеа, игри и пријателства, забава, пеење и пред сè, ширење позитивна енергија! Во текот на сите пет дена, навистина се чувствував како дома. Секој ден носеше нова приказна. Како лидер на мојата група, бев премногу горд на сите што беа дел од нашиот тим! Забавата и поврзаноста никогаш не завршија. Но, како и со сите добри работи, мораше да заврши. Стефанија Димитријовска Искуството беше спонтано, исполнето со смеа, нови пријателства и долги разговори на сите видови теми. Имаше околу 40 волонтери и лидери кои сакаа да ги продлабочат своите лидерски вештини и личен пристап. Токму тоа го учев таму – лидерство. Поконкретно, научив како да применувам различни пристапи за лидерство во различни ситуации и како еден вид пристап понекогаш може да функционира подобро од друг. Јована Кирјаковска Бев воодушевена и многу благодарна за можноста. Сите активности беа неверојатни, особено последниот ден кога имавме вежба за комуникација и стилови на комуникација. Секој избра боја што го претставуваше него/неа, па откривме колку сме различни и уникатни сите. Стекнав нови пријатели и стекнав нови знаења и искуства што се многу применливи во секојдневниот живот. Би го препорачала ова искуство на сите млади луѓе, бидејќи тоа е нешто што навистина ќе им помогне во нивната иднина. Владимир Гелов Она што ми се допадна најмногу беше тимскиот дух и интерактивните работилници. Сесиите за групна динамика и социјална безбедност беа одлични и ми помогнаа да се отворам повеќе во тимска средина. Научив многу за важноста на активното слушање, емпатијата и безбедната комуникација во рамките на групата. Сфатив како малите гестови имаат големо влијание врз чувството на припадност и доверба во тимот. Овој камп ми помогна да станам посвесен за моите силни страни и како можам позитивно да влијаам на другите. Стекнав поголема самодоверба во јавното говорење и соработката со луѓе од различни личности. Дефинитивно би ја препорачал оваа програма на секој млад човек кој сака да расте како индивидуа и лидер – особено на оние кои се заинтересирани за тимска работа, водење проекти или градење позитивни односи во заедницата. Емилија Илиевска Сакав да стекнам нови вештини во лидерство, тимска работа и организација на активности, но и да се поврзам со луѓе од различни земји и култури. Она што најмногу ми се допадна беше практичниот дел – тимски задачи, симулации и интерактивни вежби. Атмосферата беше позитивна, а размената на искуства со другите учесници беше навистина инспиративна. Научив многу работи, како на пример како ефикасно да комуницирам, да се чувствувам посигурно зборувајќи странски јазик, да се справувам со конфликти и да останам флексибилна во различни ситуации. Обуката ми помогна да станам посамоуверена во мојата улога како лидер и да развијам разни вештини што можам да ги применам и во други проекти и во секојдневниот живот. Некои од работилниците планирам да ги користам во младинската организација на моето училиште. Ова искуство е особено вредно за младите луѓе кои сакаат да растат како лидери, особено оние кои сакаат да работат со млади или во неформално образование. Мануела Спасевска Кога слушнав за овој настан, бев возбудена бидејќи моето претходно искуство беше незаборавно, спонтано и прекрасно. Имав големи очекувања бидејќи последниот камп на кој присуствував во Данска беше неверојатно добар. Сепак, овој беше одличен на свој начин. Знаев дека секој камп е различен и дека некои искуства се случуваат само еднаш, на одредено место. Убавината на настанот лежи во тоа чувство – дневните сесии беа полни со интеракција, комуникација и личен раст. Преку игри и тимски работилници, создадовме шестдневно семејство. Освен што учев за пријателството, емпатијата и создавање топла атмосфера каде што секој се чувствува безбедно и храбро, научив и за тимска работа, создавање безбедна средина, организирање кампови за различни возрасни групи, видови комуникација и работа со деца. Сите овие професионални и лични вештини се работи што ќе ги понесеме назад и ќе ги примениме во нашата работа во ИМКА. Во прилог се фотографии од ова незаборавно искуство на нашите млади лидери.

Сведоштва за кариерно насочување со ПрофилПАСС

Почетна Кои сме Мисија, Визија, Вредности Запознајте го тимот Управување Историја за ИМКА Што работиме Програми Новости Вклучи се Партнерства Контакт MK MK EN X Донирај Последни новости Сведоштва за кариерно насочување со ПрофилПАСС Ана, Студент на Факултет Отсекогаш сум сакала да се откривам себеси, па со тоа, пополнувањето на прашалници, како и решавањето на психолошки тестови и квизови за себеспознавање, кај мене будело љубопитност и интерес. Со Профил Пас кариерното советување бев пријатно изненадена од уникатното искуство кое го стекнав и различниот пристап од останатите испитувања на кои сум била изложена порано. Тоа ми овозможи додатно да се спознаам себеси, да се соочам со моите доблести и недостатоци за да научам како да се справувам со нив. Исто така открив кои се останатите категории/типови на луѓе и како тие функционираат и сега применувам здрава комуникација со нив, зависно од нивниот карактер.Дефинитивно ваквиот начин на самопроверка е уникатен сам по себе и имам чувство дека ми даде најпрецизни и најрелевантни резултати. Би го препорачала посебно на оние кои чувствуваат некаква криза во идентитетот, не знаат кој кариерен пат да го одберат или чувствуваат дека не се среќни во својата работа. Исто така треба да се примени и кај средношколците, бидејќи во нивна возраст се доволно зрели да разберат и тогаш им е најпотребно да се спознаат себеси за да знаат по кој пат да се движат. Ангела, средношколка Додека учествував во процесот се чувствував слободно да го споделам она што сакам да го изразам за себе и добив уверување дека преку овој метод ќе добијам насока што ќе ми одговара, а во исто време ќе можам да научам нешто ново за себе. Бидејќи имав сесии еден на еден, се чувствував слободно и без стрес. Најпријатниот дел од активноста беше приватноста што ја имав додека учествував. Научив за себе дека сум алтруистичка личност која има големи аналитички и инженерски способности и преку состаноците добив насока како понатаму да се изградувам како личност. Со оглед на тоа што немав конкретна идеја што да правам понатаму кога започнав со мојот кариерен живот, активноста особено ми помогна да можам да истражувам и да одлучам кои работни места ќе ми одговараат според моите искуства и способности.Верувам дека не би можела сама да го направам тоа со еднаква ефикасност доколку не учествував во Профил Пас кариерното советување. Добив и насоки за тоа кои работни места да ги истражувам врз основа на моите искуства, вештини и интереси и како да го збогатам моето CV, работи кои ќе ги применувам во текот на мојот живот. Порано имав голем стрес бидејќи верував дека нема сигурен кариерен пат за мене и не бев сигурна дали некогаш ќе се вработам во иднина. Преку оваа активност научив дека постои таков и секој има сигурен пат во кариерата и јас можам да го најдам мојот пат. Ова беше многу корисно за мене и верувам дека ќе биде од голема помош и за оние околу мене.Мислам дека оваа методологија ќе им користи на најмладите во средното образование кои сè уште не се сигурни што понатаму по средното образование, на пример, на кој универзитет да одат кога ќе станат полнолетни. Мислам дека има толку многу млади луѓе несигурни во себе и без идеи за нивниот иден професионален живот и оваа активност би им била од голема корист. Наташа, младински работник Кога првпат дознав за кариетното советување Профил Пас, бев љубопитна, но не и премногу оптимистка. Ме потсети на минатите искуства во средно училиште кога работевме со психолози за да разговараме за нашите идни образовни патишта. Моите очекувања беа скромни, но сепак решив да му дадам шанса. Сфатив дека иако работев речиси една деценија, ангажирањето во саморефлексија и разбирањето на моите лични и професионални афинитети сè уште може да биде вредно.Процесот поттикна искреност и отвореност од моја страна, што ми овозможи длабоко да размислувам за моите квалитети и искуства од минатото. Имаше моменти кога ми требаше дополнително време да се потсетам на одредени детали, но тоа само го направи процесот позначаен. И покрај моето долгогодишно искуство како младински работник, волонтер и координатор на волонтери, открив нови сознанија за себе. Оваа активност ми помогна да ги потврдам моите силни страни, да ги препознаам областите за раст и да се чувствувам посигурна во мојата кариера.Генерално, сметам дека ова искуство беше корисно за мене. Тоа не само што ја подобри мојата самосвест, туку ми даде и практични алатки, како детален документ кој ги сумира моите резултати, кои можам да ги користам за личен и професионален развој. Би го препорачала Профил Пас кариерното советување на средношколците кои се подготвуваат за факултет или на млади луѓе кои не се сигурни за насоката на нивната кариера. Андреа, средношколка На почетокот немав некои големи очекувања, но се чувствував како навистина да ми треба оваа активност. Оваа активност не само што ме натера да се запознаам себеси, туку ми овозможи да ги осознам сите мои способности, вештини и особини, мојот карактер што навистина ми помогна, како во личниот, така и во професионалниот развој. На пример, после оваа активност постепено забележав колку ми беше полесно да формирам нови соработки и познанства и да пристапувам до нови искуства. Профил Пас кариерното советување го препорачувам на сите, но особено на младите кои не се познаваат доволно и верувам дека ќе им помогне како што мене ми помогна мене. Лука, средношколец На некој начин научив повеќе за себе и беше интересно, но најмногу ми се допадна делот кога се консултирав со психологот за мојот живот, бидејќи бев отворен и искрен, исто така и за моите интереси за иднината, како важна дел за секој млад човек. Не можам да потврдам за професионален раст, бидејќи се уште сум млад, но знам дека сигурно ќе ми биде од корист. Тие се однесуваат на секојдневниот живот, како што е подигнувањето на самодовербата кај младите и затоа разговорите со психолог на овие теми се многу корисни за почеток. Профил Пас кариерното советување им ја препорачувам на младите кои сакаат подобро да се запознаат себеси, да откријат во што се добри и што сакаат да работат и прават во иднина. Генерално, ова беше

Впечаток што трае – Фестивалот „Wonderful Days“ 2025 низ очите на нашите млади

Последни новости Впечаток што трае – Фестивалот „Wonderful Days“ 2025 низ очите на нашите млади Во јули 2025 година, осум претставници од нашата ИМКА – двајца лидери и шест млади на возраст од 13 до 18 години – беа дел од незаборавниот младински фестивал Wonderful Days во Данска. Овој уникатен камп-фестивал организиран од ИМКА Данска секои две години претставува вистинска авантура на отворено исполнета со концерти, работилници, спортски активности, моменти за лична рефлексија и многу нови пријателства. Благодарение на поддршката од програмата Еразмус+, македонските учесници имаа шанса да бидат дел од овој настан заедно со млади од неколку други европски земји. Wonderful Days не е обичен фестивал – тоа е заедничко доживување што инспирира, обединува и охрабрува млади луѓе преку неформално образование, волонтеризам и забавни активности. Нашите учесници се вратија полни со нови идеи, вештини и мотивација, подготвени да пренесат дел од фестивалскиот дух и кај нас. Во продолжение ви ги пренесуваме нивните лични впечатоци – искрени, живописни и полни со благодарност. МихаилМоите први мисли кога дознав за фестивалот во Данска беа дека оваа ќе биде незаборавно. Мислам дека сите имавме некои очекувања, но тоа јас што го очекував, испадна реалност, рај за млади. Се чувствував прифатен и бев многу среќен дека сите беа дружељубиви и комуникативни. Аспектот за интернационални запознавања ми беше многу пријатен – споделувавме наши култури и игри. Научив да бидам комуникативен и да уживам во природата. Активностите кои ги имавме на огнот ми влијаеа позитивно – учев како да правам прибор за јадење од дрво и секакви други скулптури. Целокупно искуство би го опишал незаборавно, екстремно забавно и незаборавно за кој и да оди во иднина. ТеонаЗатоа што кај нас не постојат вакви настани почетната помисла ми беше дека ова е нешто невозможно за мене, но сепак со мала надеж се пријавив. Се чувствував возбудливо со мала доза на страв дали ќе ги успеам, но на ова место ништо не е невозможно и тука секој ти дава надеж и сила дека се можеш. Стекнав нови искуства поради тоа што прв пат кампував. Се запознав подобро и себе си. После секоја активност се чувствував посилно од тоа што верував дека сум. Првенствено научив да живеам поедноставно од она што го живеам во секојдневниот живот. Научив да бидам поснаодлива, научив дека вредам, дека луѓето ги интересира моето мислење. Би го препорачала овој фестивал и на многу други млади зашто се учат првенствено многу работи кои понатаму помагаат за секојдневниот живот и за личен раст. СтефанијаПред заминувањето, очекував нешто помалку, но беше предобро, а и местото беше супер, чисто и средено. За време на сите активности се чувствував предобро и прифатено од страна на сите. Преку учеството на овој фестивал стекнав нови вештини, подобра комуникација со другите и дисциплина. Порано се двоумев дали да се вклучам во нови активности. Сега сум поотворена за предизвици и стекнав нови пријателства што исто така ми значи многу. Овие типови на едукација би ги препорачала. Затоа што учиш како да работиш тимски, стекнуваш нови знаења и дисциплина што е најважно. Фестивалот беше предобро организиран и сакам да му препорачам на секој што има шанса да ја искористи. ЕмилијаОд моментот кога разбрав за фестивалот бев пресреќна и возбудена за оваа авантура бидејќи никогаш претходно не сум имала такво искуство. На фестивалот научив за тимска работа, научив како да бидам повеќе одговорна, а исто така и развив многу други вештини како и креативност и отпорност на предизвици. На кампот научив многу работи кои ќе ги користам и понатаму во секојдневниот живот како флексибилност и решавање на проблеми и изнаоѓање креативни решенија. Исто така научив како да го искористам целиот ден и да се чувствувам исполнето. Препорака: Мислам дека во следните шест месеци нема да престанам да му раскажувам на сите како си поминав, бидејќи беше едно незаборавно и презабавно искуство. Му препорачувам на секој да учествува доколку има ваква прилика бидејќи никој не те учи вакви работи кои ќе ги научиш на кампот: пријателството, вештините, искуството и сеќавањата. Целокупно искуство: Би го опишала ова искуство со еден збор – неверојатно. ЈованаИскрено не мислев дека ќе имам толку среќа за да бидам дел од една ваква авантура и немав никакви очекувања, но кога дознав дека ќе учествувам на кампот знаев дека ќе си поминам преубаво, дека ќе запознам нови пријатели, дека ќе научам нешто ново. Најпривлечни активности ми беа активностите кои можевме да ги правиме во слободно време како: плетење, шиење, работа со глина, изработка на белегзии. Учеството во еден ваков организиран камп фестивал значи да имаш вистинска можност да учиш многу нови нешта каде се наоѓаш во друга околина и запознаваш различни личности. Работите кои ги учиш во овие активности на кампови се применливи и корисни во секојдневниот живот. Овие активности на кампови, овие дружења, спомени, искуства им ги препорачувам на секој млад човек затоа што почнува да станува посвесен, посамоуверен, стекнува нови пријателства и станува по храбар. МануелаНе можев баш да замислам како би изгледал камп фестивал затоа што прв пат учествував на ваков настан. Фактот што сите кои беа во мојата група веќе ги познавав значеше дека единствено очекување ми беше да имам прекрасна дружба! Секоја игра беше нова за нас и направена за да не вклучи. Така успеав да уживам во секоја поединечна активност која ни се нуди, вклучувајќи дури и еден најобичен разговор со некој од интернационалците. Сето тоа беше можност за личен развој. Во овој 21 век сите се со мисла дека треба да изгледаат совршено, да се однесуваат совршено, да немаат мани, да се трудат да бидат најдобри, да се натпреваруваат меѓусебно и да се трудат најмногу за своите социјални мрежи. Но на камп, се сеќаваме на вистинските стандарди, на она што е навистина важно. На добрината, на пријателството, на хуманоста, на лојалноста и на љубовта! Веруваме дека ваквите доживувања на Wonderful Days оставаат трајни впечатоци и ги охрабруваат младите да бидат поактивни, посамоуверени и поотворени кон светот околу себе. Гордана – групен лидерКога првпат слушнав за летниот камп во Данска, почувствував возбуда и љубопитност. Веднаш ми се виде како одлична можност за нови искуства, запознавање нови луѓе

Повеќе од камп: Приказни што остануваат со вас

Последни новости Повеќе од камп: Приказни што остануваат со вас Сведоштва на ученици на кампот Ова лето, група девојки од различни училишта и позадини се собраа во кампот GLOW – и си заминаа со повеќе од само прекрасни спомени. Она што започна како забавна летна можност брзо се претвори во искуство што го менува животот, полно со личен раст, нови пријателства, смеа и учење што стигна далеку подалеку од камповите. Михаела, 15-годишна ученичка по медицина, кампот стана место за градење самодоверба и учење како подобро да комуницираат со другите. „Сè што научивме е нешто што можеме да го користиме во секојдневниот живот – а пријателствата сè уште остануваат.“ Ема, 14, пристигна нервозна, но надежна – и си замина со полно срце. Таа го опиша кампот како забавен, едукативен и длабоко овластувачки. „Научив да зборувам пред други без да бидам срамежлива“, рече таа. „Станав подобра во работата во тим, стекнав пријатели и станав посигурна.“ Ана Марија, исто така 15, сметаше дека овие активности треба да ги доживеат сите тинејџери – дури и возрасните. Кампот ја научи на практични и емоционални лекции кои, како што рече, „го променија нејзиниот секојдневен живот“. Таа верува дека овој вид камп е особено важен за помладите генерации да се исклучат од своите телефони и да се поврзат повеќе со луѓето. Емилија, 16, го нарече своето искуство со GLOW „неверојатно“. Таа не пронајде само радост во моментот, туку и алатки за живот – учење на вредноста на отпорноста, лидерството и како вистинската сила лежи во единството и поддршката. „Никој не ве учи на овие работи на начинот на кој тоа го прави кампот“, рече таа. „Пријателствата, вештините, спомените – тие остануваат со вас“. Ангела, 14, ја прифати секоја активност – од поставување шатор за прв пат до учење како да се изрази со поголема самодоверба. „Од кампот, почнав подобро да се грижам за себе и повеќе да зборувам“, сподели таа. „Ми помогна да се отворам и да работам во тим“. За Јана, 15, магијата беше во енергијата. „Беше забавно, едукативно и ми помогна да бидам поотворена“, рече таа. Особено уживаше во игрите со вода, тимската работа и чувството на учење преку играње. Овие девојки дојдоа во кампот GLOW барајќи нешто ново. Тие си заминаа со нови вештини, нови пријателства и посилно чувство за тоа кои се – и кои можат да станат. Сведоштва од персоналот „Навистина го ценам тоа што бев дел од првиот пат од враќањето на кампот. Од тука е само нагоре. Ви благодарам многу!“ – Лизи Бредшо, волонтерка на Мировниот корпус „Особено со кампот GLOW, имаше ентузијазам и возбуда за учество. Беше јасно дека се воспоставени значајни врски. Цел тим работеа навистина добро заедно и имаа јасни можности за развој на програмата следната година!“ — Шејна Мелцер, волонтерка на Мировниот корпус „Ова беше предизвик за мене, бидејќи тоа беше прв пат директно да бидам вклучена во планирањето кампови на отворено, работејќи со тим од САД кои имаат богато и реално искуство зад себе. Секако, секогаш има простор за подобрување и со нетрпение очекувам повеќе вакви или слични активности во иднина.“ — Наташа Дарков, персонал на YMCA „Девојките се забавуваа прекрасно, што е главната цел. Навистина сум среќна што камповите повторно се одржуваат и едвај чекам да видам како можам да придонесам за да се вратат во нивната поранешна слава! Со Божја помош!“ — Роберта Петровска, локална волонтерка Анкета за камперите По учеството во кампот, многу девојки се чувствуваат значително посигурни во своите способности за донесување одлуки (72% високо ниво на согласност) и посветени на исполнување на своите обврски (67%). Повеќето учеснички изјавија дека се посвесни и проактивни во грижата за своето физичко и емоционално здравје (78%), како и дека имаат значително зголемување на самодовербата, безбедноста и независноста (67%). Многу од нив се чувствуваат поефикасни во тимската работа (78%), нивната способност за соработка со другите е подобрена (78%), а тие се исто така поподготвени да ги стават целите на групата пред своите (72%). Исто така, 72% повеќе ги ценат и ги разгледуваат различните мислења и подобро ја разбираат групната динамика. Учесниците покажаа зголемен интерес за истражување нови искуства (89%) и голема подготвеност да излезат од својата зона на удобност и да пробаат нови работи (85%). Тие се чувствуваат посигурно кога се среќаваат и комуницираат со нови луѓе (79%) и поефикасно работат во група (85%). Анкета на родители на учесници За подобро да го разбереме влијанието на овогодинешниот камп GLOW, ги замоливме родителите на учесниците да ги споделат своите впечатоци. Нивните одговори покажаа не само силно задоволство од искуството, туку и видливи промени кај нивните ќерки по завршувањето на кампот. Сите родители се согласија дека кампот бил корисен за нивните ќерки – јасен знак дека GLOW продолжува да нуди значајна содржина и поддржувачка средина. Кога станува збор за целокупното искуство во кампот, големо мнозинство родители го оценија како одлично, а останатите рекоа дека е над просекот или просечно. Активностите исто така добија високи пофалби, при што повеќето од нив ги опишаа како одлични, а малкумина како многу добри. Еден од нај охрабрувачките резултати дојде од прашањето за промените кај децата по кампот. Повеќето родители рекоа дека виделе позитивна разлика – нивните ќерки се вратија дома посреќни, посигурни, покреативни и по социјално ангажирани. Неколкумина забележаа дека се смеат повеќе, иницираат разговори или се изразуваат на нови начини, а неколкумина сè уште не беа сигурни или не видоа забележителна промена. Повеќето родители сметаа дека кампот ги исполнил нивните очекувања и кога биле прашани како GLOW се споредува со другите кампови во земјата, половина рекле дека е меѓу најдобрите, додека други немале точка за споредба. Родителите го опишаа GLOW како безбеден простор каде што девојчињата можат да се изразат, да пробаат нови работи и да растат – емоционално, социјално и креативно. Многумина изразија благодарност што постои таква програма и се надеваат дека ќе ја видат како продолжува и во наредните години.

Сведоштва од врсничката школа за ученици од основните училишта

Последни новости Сведоштва од врсничката школа за ученици од основните училишта Јована Георгиевска, училиште Д-р. Трифун Пановски Од сите теми, “Како да се справиме со врсничко насилство” беше моја омилена тема за презентирање бидејќи ние ги поучувавме децата како да се спротивстават и да создадат своја самодоверба. Во иднина, би сакала повторно да сум врснички едукатор бидејќи сметам дека ова е важна тема на која и треба да се зборува не само на час, бидејќи секојдневно ја гледаме но многумина не прават ништо да ја спречат. Фуркан Метлику, училиште Гоце Делчев Со помош на предавачите и работилниците станав посамоуверен и подготвен да зборувам пред други. Најмногу ме заинтересира темата за психичко насилство, затоа што тоа често се случува, а тешко се препознава. На презентациите пред учениците ме радуваше тоа што учениците слушаа внимателно и покажаа интерес. Верувам дека научија нешто важно. Би сакал повторно да бидам врснички едукатор, затоа што ова искуство ми помогна да се изразувам подобро, да стекнам самодоверба и да бидам поддршка за другите. Мерт Рустемов, училиште Даме Груев Да бидам врснички едукатор за спречување на насилство за мене беше голема одговорност, но и можност да научам нешто ново и да помогнам на другите. Преку работилниците и обуките добив самодоверба и се чувствував подготвен да зборувам пред други ученици. Темата за врсничкото насилство ја сметам за многу важна, бидејќи секој од нас има право да биде безбеден и почитуван во училиштето. Најинтересно ми беше кога преку игри и дискусии научивме како да препознаеме различни видови насилство и како правилно да реагираме. Се чувствував најмногу возбуден кога требаше да зборувам пред другите ученици, но со текот на времето сфатив дека нема место за срам и страв – важно е да се зборува отворено. Сметам дека ваквите активности се исклучително важни и би сакал повторно да бидам врснички едукатор. Чувството дека можам да направам промена, дури и мала, ми дава сила да продолжам. Јован Гроздановски, училиште Коле Канински Кога слушнав за оваа работилница јас имав трема за запознавање со нови деца, но со секоја нова работилница јас се опуштив се повеќе и повеќе. Пред да презентирам во моето училиште како врснички едукатор, јас имав страв, но за време на презентацијата јас се опуштив. Нешто што ми помогна да се опуштам се децата кои учествуваа на работилницата, бидејќи тие беа отворени и споделуваа свои искуства со врснички насилство и како тие се справуваа со тоа. Јана Лозанче, училиште Св. Кирил и Методиј Работилниците ни помогнаа да се поврземе меѓу себе, да изградиме тимска доверба и да се чувствуваме сигурно кога зборуваме пред други ученици. Најинтересен дел ми беше кога учениците споделуваа искуства за насилство што го преживеале или го виделе. Тоа беше момент кога навистина почувствував колку оваа тема е сериозна и важна. Во тие моменти научив дека секое дете крие приказна зад своето однесување и дека треба да бидеме тука едни за други. Најтежок дел ми беше подготовката за презентацијата. Иако бевме подготвени и имавме поддршка сепак имав трема и се прашував дали ќе кажам се како што треба. Но, кога видов дека децата навистина слушаат почувствував дека навистина правиме нешто добро. Би сакала повторно да бидам дел од вакви активности, дури и да бидам повторно врснички едукатор.

Можности за практикантство во ИМКА: Поддршка на младите професионалци во нивниот развој

Последни новости Можности за практикантство во ИМКА: Поддршка на младите професионалци во нивниот развој Леона Практиканството ми помогна на неколку начини. Ми даде можност да го применам моето академско знаење во реална средина, овозможувајќи ми да стекнам практично искуство во графичкиот дизајн. Работата на различни проекти ми помогна да ги развијам моите креативни вештини, да го подобрам мојот процес на дизајнирање и да станам посигурна во моите способности. Дополнително, праксата ме научи како ефикасно да работам во тим, да соработувам со другите и да ги исполнувам роковите, што се вредни вештини за мојата идна кариера. Исто така, ми овозможи подобро разбирање на професионалната средина и важноста на комуникацијата и повратните информации за постигнување квалитетни резултати. Генерално, ова искуство значително придонесе за мојот личен и професионален развој. Фидела Моето име е Фидела и сум студент на мастер студии. Во текот на моите студии имав можност да станам дел од ИМКА како практикант. Сакам да споделам дека во времето на мојата практиканска работа во организацијата стекнав вештини и знаења што многу придонесоа за мене како студент, како и за мојот професионален развој. Дополнително, би сакала да го истакнам и моето позитивно искуство во работата со мојот ментор, бидејќи неговата поддршка и соработка значително допринесе за успешното извршување на моите задачи.

Сведоштва на учесници од врсничката школа за средни училишта

Почетна Кои сме Мисија, Визија, Вредности Запознајте го тимот Управување Историја за ИМКА Што работиме Програми Новости Вклучи се Партнерства Контакт MK MK EN X Донирај Последни новости Сведоштва на учесници од врсничката школа за средни училишта Михаела, Гимназија Таки Даскало На обуката за врсничко насилство имав можност да држам презентација пред 40 ученици и двајца психолози во моето училиште. Беше огромно искуство за мене, но истовремено и голем предизвик. Најмногу ме плашеше тоа дали ќе успеам да го задржам вниманието на сите, особено кога знаев дека ќе ме слушаат не само ученици од прва и втора година, туку и професионалци. Тремата и стравот од грешки беа постојано присутни бидејќи ми беше важно мојата порака да биде јасна и добро разбрана. Кога заврши презентацијата, ми олесна и се почувствував многу среќна и опуштена. Иако имав страв, успеав да го совладам и да ја пренесам темата со посветеност. Беше прекрасно да видам како моите зборови влијаат врз учениците, а и да слушнам позитивни повратни информации од сите нив. Тоа ми даде дополнителна мотивација и самодоверба. Дефинитивно би презентирала пак. Секое ново искуство од ваков тип ми помага да се подобрам и да се чувствувам посигурно во себе сега, но и за во иднина. Гледам на тоа како шанса да растам и да го пренесувам своето знаење на други. Кога станува збор за работа со основци, со задоволство би прифатила. Верувам дека работата со помлади ученици е исклучително важна, бидејќи тие се во период кога најмногу учат и се формираат како личности. Би сакала да им помогнам да научат како да се справуваат со насилство и да создаваат позитивни односи со луѓето околу нив. Преку ова искуство уште повеќе сфатив дека се пронаоѓам во психологијата каде сакам да се развивам во иднина. Сакам да продолжам да работам со млади луѓе, да ги инспирирам и да им помагам да се справуваат со предизвиците што ги носи животот. Предраг, Техничко училиште Ѓорги Наумов Јас сум Предраг, имам 15 години и учам во средното техничко училиште. Правев презентација пред отприлика дваесеттина деца и учевме за справување со врсничкото насилство. Од презентацијата јас многу научив за себе, но и за другите. Научив дека имаат проблеми и луѓето кои го вршат насилството, а не само тие кои се жртви на истото. Огнен, Техничко училиште Ѓорги Наумов Јас сум Огнен, ученик во техничкото училиште во Битола и бев врснички едукатор од Школата против врсничко насилство. Пред да почнам со презентацијата се плашев дека можам многу лесно да се збунам и да не бидам разбран или да ја заинтересирам публиката, но тоа веднаш се смена штом почнав да презентирам. Од кога заврши презентацијата се осеќав убаво, олеснето и исполнето дека помогнав во подигање на свеста за врсничкото насилство што се случува во денешното општество. Дефинитивно би сакал да презентирам пак и пред мои врсници, но и пред основци за оваа тема, заради тоа што темата е од големо значење за сите. Нектарија, Гимназија САБА Јас сум Нектарија Илиевска, ученичка во втора година во гимназијата САБА. Пред да дојдам на оваа работилница имав страв од презентација пред многу луѓе, пред деца, како и запознавање со нови деца, но како што врвеше времето со секоја нова работилница се запознававме со децата. Кога требаше да презентираме и ние како врснички едукатори во нашите училишта нештата се променија и бев многу опуштена. Мило ми е што многу учесници се опуштија и почнаа да споделуваат свои искуства, дали тие биле насилници или пак трпеле насилство. И се надевам дека во иднина повеќе ќе се приклучуваат кон вакви работилници за да влијаеме на намалување на насилството. Теодора, Медицинско училиште Јован Калаузи Јас сум Теодора, учам во средното медицинско училиште и имам 16 години. За оваа презентација сметам дека беше корисна и дека научив многу нови работи. Знам дека оваа презентација ќе ми користи и понатаму и знам дека тие што ме слушаа ќе дознаат нешто повеќе што всушност претставува врсничкото насилство. За презентацијата воопшто немав трема и никој не треба да има трема. Не е ништо страшно и доколку си едуциран за тоа што зборуваш тогаш е лесно да се искажеш за сите оние кои сакаат да те слушаат. Ги оспособуваме младите Facebook-f Instagram Twitter Youtube Flickr Linkedin-in Телефон+389 70 59 43 41+389 72 556 386 ЛокацијаМладински Центар Битола, ул.Крушево, бр.5, 7000 Битола, С. Македонија Поштенска адреса Васко Карангелевски РЕМО 1/3/42, 7000 Битола, С. Македонија Почетна Кои сме Што работиме Новости Донирај Контакт © Copyright 2024 | ymca.mk | Сите права се заштитени. Design & Build by IanMcKenzieCreative

Светски акцелераторски самит на ИМКА: Визија 2030 во Момбаса, Кенија 

Почетна Кои сме Мисија, Визија, Вредности Запознајте го тимот Управување Историја за ИМКА Што работиме Програми Новости Вклучи се Партнерства Контакт Languages X Донирај More than 2 results are available in the PRO version (This notice is only visible to admin users) Последни новости Светски акцелераторски самит на ИМКА: Визија 2030 во Момбаса, Кенија  Од Наташа Дарков Од 21 до 26 октомври 2024 година, имав неверојатна привилегија да присуствувам на Светскиот акцелераторски самит на ИМКА во Момбаса, Кенија. Овој собир беше клучен момент за Визијата 2030 на ИМКА, собирајќи над 400 делегати од целиот свет, вклучувајќи млади кои делуваат како агенти за промени, претседатели, персонал и волонтери. Претставувањето на ИМКА Македонија како една од трите организации со врвен успех во спроведувањето на обемното истражување за значајни работни места за млади поддржани од Делоит Австралија беше вистинска чест и врв на моето патување. Од 90 кандидати на глобално ниво, бев почестена да бидам една од трите избрани за оваа важна улога.  Самитот започна со топол и свечен прием организиран од генералниот секретар на ИМКА Кенија. Секој делегат беше лично пречекан, со најава за една недела исполнета со другарство и поврзаност. Забавата на вечерта го покажа богатото културно наследство на Кенија преку музика, танц и традиции, создавајќи живописен и незаборавен вовед во земјата домаќин.  Почнувајќи од вториот ден, фокусот се префрли на столбовите на Визија 2030: Одржлива планета, значајни работни места, благосостојба на заедницата и праведен свет. Ангажираните пленарни сесии вклучуваа инспиративни говорници, вклучително и генералниот секретар на ИМКА Свет и претставници од УНИЦЕФ, Обединетите нации и Habitat for Humanity, кои беше огромна чест да се слушаат во живо. Според мене една од највредните за мене активности беше иницијативата „Тату Тату“, која не охрабри нас учесниците од различни нации да се поврземе и да разменуваме перспективи за конкретни теми во текот на целата недела. Тоа беше моќен потсетник за силата и различноста на глобалната мрежа на ИМКА.  Третиот ден понуди можност да посетиме локални граѓански организации во Момбаса. Јас го избрав SOTE HUB, динамичен бизнис инкубатор кој поддржува стартапи во области како дигитализација, земјоделство и климатски промени. Сведочењето на нивната влијателна работа од прва рака беше инспиративно и усогласено со пошироките цели на Визија 2030. Подоцна истиот ден, сите делегати се собравме во ИМКА Момбаса на средба и поздравување со нивниот персонал. Посетата опфати привлечен сегмент од културна размена и заврши со незаборавна групна фотографија која го долови духот на нашата заедничка мисија.  Четвртиот ден се фокусираше на свеста за менталното здравје – тема блиска до моето срце. Програмата вклучуваше презентации кои предизвикуваат размислување и видео пораки од претставници во Хонг Конг и Хондурас, проследени со групни дискусии кои длабоко навлегуваа во пристојни работни места за млади. Беше одлично искуство за размена на идеи и согледувања со врсници од целиот свет. Таа вечер, европските делегати се собраа на неформален собир за да споделат предизвици, искуства и можности за соработка. Овие дискусии го зајакнаа моето чувство за припадност на заедница која поддржува и иновира.  На петтиот ден истражувавме теми преку панел дискусии водени од меѓународни претставници по што следуваше завршната работилница за пристојни работни места за млади. За време на церемонијата на затворање беа доделени награди за секој столб на Визија 2030. Иако наградата за дигитални хабови ја доби Центарот за рехабилитација во Ерусалим, почувствував огромна гордост што ИМКА Македонија, заедно со Западен Балкан и Молдавија, беше номинирана за ова значајно признание. Денот заврши со висока нота со гала вечера организирана од Y’s Men International, славејќи ги нашите заеднички достигнувања и вмрежување.  Последниот ден од самитот ни беше време за размислување, вмрежување и градење трајни односи. Секое утро во неделата започнуваше со резимирани видеа кои ги доловуваат најважните моменти од претходниот ден, а овие моменти ќе ми останат како најдобри спомени. Самитот „Визија 2024“ беше огромен успех и јас ја оставив Момбаса инспирирана и подготвена да придонесам за целите на ИМКА „Визија 2030“. Ова искуство не само што ја продлабочи мојата посветеност на пристојни работни места за млади, туку и ја потврди трансформативната моќ на глобалната соработка и заедничката цел.  Засекогаш ќе ја ценам можноста што ја претставував ИМКА Македонија и да бидам дел од овој трансформативен настан и ја изразувам мојата срдечна благодарност до сите што го овозможија ова патување. Ви благодарам што ми дозволивте да бидам сведок на магијата на единството, иновативноста и надежта на глобалната сцена.  Повеќе фотографии може да видите во Албумот.  Ги оспособуваме младите Facebook-f Instagram Twitter Youtube Flickr Linkedin-in Телефон+389 70 59 43 41+389 72 556 386 ЛокацијаМладински Центар Битола, ул.Крушево, бр.5, 7000 Битола, С. Македонија Поштенска адреса Васко Карангелевски РЕМО 1/3/42, 7000 Битола, С. Македонија Почетна Кои сме Што работиме Новости Донирај Контакт © Copyright 2024 | ymca.mk | Сите права се заштитени. Design & Build by IanMcKenzieCreative