Младинскиот Центар низ бројки 2024

Почетна Кои сме Мисија, Визија, Вредности Запознајте го тимот Управување Историја за ИМКА Што работиме Програми Новости Вклучи се Партнерства Контакт Languages X Донирај More than 2 results are available in the PRO version (This notice is only visible to admin users) Последни новости Младинскиот Центар низ бројки 2024 Во мај 2023 година, во Битола беше отворен Младинскиот центар, се со цел да обезбедиме безбеден и инклузивен простор преку различни програми, активности и менторство, каде што имаме за цел да го поттикнеме личниот развој, да негуваме лидерски вештини и да создадеме чувство на припадност кај младите. Со Младинскиот центар раководат 3 младински организации од Битола, ИМКА Сфера Интернационал и МКЦ. После успешно поминатата 2023 година, со вкупно опфатени 2 651 корисници и повеќе од 200 одржани активности, продолжи работата на младинскиот центар со уште поголем ентузијазам и желба за што поголем број на учесници и активности. Во однос на осумте претходно поставени конкретни цели на овој центар, се понудија програмски активности кои во голема мера се исполнети. Овозможен е безбеден простор каде младите можат да си го поминуваат своето слободно време, да ги развиваат своите компетенции, да им се поттикне претприемачкиот дух, промовирани им се здрави животни навики, како и подигање на еколошката свест, информирање за можностите за неформално образованиe, зајакнување на активното граѓанство и промовирање на волонтерството. Во периодот на известување од 01 јануари до 31 декември 2024 година: – беа опфатени 4,469 корисници преку 300 различни активности, од кои голем број од нив се одржуваа повеќекратно. Активностите беа понудени од страна на младинските работници на МЦБ или од различни понудувачи на младинска работа, односно над 15 различни понудувачи за младинска работа ги користеа просторите на Младинскиот Центар Битола за да ги остварат своите активности. Најпосетувани теми беа: дигитално образование, ментално здравје, животна средина, младинско учество и младински политики како и забавните/друштвени активности. Би сакале да издвоиме две програмски активности, водени од ИМКА:   Клубот за дигитално образование е втора година по ред еден од најпосетуваните клубови во центарот, се со цел да се постигне поголема дигитална писменост кај младите, како и Врсничката школа за ментално здравје и деца која што со 60тина врснички едукатори, опфати околу 2000 учесници во сите училишта во Општина Битола, како и врсничката школа против врсничко насилство која опфати околу 170 учесници од средните училишта. Активностите на оваа школа продолжуваат и во 2025 година, со фокус на учениците од основните училишта во Општина Битола. Резултатите од работата на МЦБ во периодот од 01 јануари до 31 декември 2024 година се доказ на посветеноста за континуирано работење и организирање активности со цел професионален и личен развој на младите во Битола, како и за поттикнување на нивно учество во донесувањето одлуки значајни за нив во нивната локална заедница. Успехот на програмите е очигледен најмногу преку континуираното зголемување на бројките на посетеност на активностите на младинскиот центар, со што во годишниот период за 2024 година се достигнати поголеми бројки од вкупните посетители во минатата 2023 година. Тоа е резултат на посветеноста на организациите кон унапредување на МЦБ и зголемување на неговата препознатливост кај младите. Целосниот годишен извештај на младинскиот центар на македонски јазик е достапен на веб-страницата на Младинскиот центар. Ги оспособуваме младите Facebook-f Instagram Twitter Youtube Flickr Linkedin-in Телефон+389 70 59 43 41+389 72 556 386 ЛокацијаМладински Центар Битола, ул.Крушево, бр.5, 7000 Битола, С. Македонија Поштенска адреса Васко Карангелевски РЕМО 1/3/42, 7000 Битола, С. Македонија Почетна Кои сме Што работиме Новости Донирај Контакт © Copyright 2024 | ymca.mk | Сите права се заштитени. Design & Build by IanMcKenzieCreative

Сведоштва на учесниците на Школата против врсничко насилство

Почетна Кои сме Мисија, Визија, Вредности Запознајте го тимот Управување Историја за ИМКА Што работиме Програми Новости Вклучи се Партнерства Контакт Languages X Донирај More than 2 results are available in the PRO version (This notice is only visible to admin users) Програми Сведоштва на учесниците на Школата против врсничко насилство Михаела На обуката за врсничко насилство имав можност да држам презентација пред 40 ученици и двајца психолози во моето училиште. Беше огромно искуство за мене, но истовремено и голем предизвик. Најмногу ме плашеше тоа дали ќе успеам да го задржам вниманието на сите, особено кога знаев дека ќе ме слушаат не само ученици од прва и втора година, туку и професионалци. Тремата и стравот од грешки беа постојано присутни бидејќи ми беше важно мојата порака да биде јасна и добро разбрана. Кога заврши презентацијата, ми олесна и се почувствував многу среќна и опуштена. Иако имав страв, успеав да го совладам и да ја пренесам темата со посветеност. Беше прекрасно да видам како моите зборови влијаат врз учениците, а и да слушнам позитивни повратни информации од сите нив. Тоа ми даде дополнителна мотивација и самодоверба. Дефинитивно би презентирала пак. Секое ново искуство од ваков тип ми помага да се подобрам и да се чувствувам посигурно во себе сега, но и за во иднина. Гледам на тоа како шанса да растам и да го пренесувам своето знаење на други. Кога станува збор за работа со основци, со задоволство би прифатила. Верувам дека работата со помлади ученици е исклучително важна, бидејќи тие се во период кога најмногу учат и се формираат како личности. Би сакала да им помогнам да научат како да се справуваат со насилство и да создаваат позитивни односи со луѓето околу нив. Преку ова искуство уште повеќе сфатив дека се пронаоѓам во психологијата каде сакам да се развивам во иднина. Сакам да продолжам да работам со млади луѓе, да ги инспирирам и да им помагам да се справуваат со предизвиците што ги носи животот. Предраг Јас сум Предраг, имам 15 години и учам во средното техничко училиште. Правев презентација пред отприлика дваесеттина деца и учевме за справување со врсничкото насилство. Од презентацијата јас многу научив за себе, но и за другите. Научив дека имаат проблеми и луѓето кои го вршат насилството, а не само тие кои се жртви на истото. Огнен Јас сум Огнен, ученик во техничкото училиште во Битола и бев врснички едукатор од Школата против врсничко насилство. Пред да почнам со презентацијата се плашев дека можам многу лесно да се збунам и да не бидам разбран или да ја заинтересирам публиката, но тоа веднаш се смена штом почнав да презентирам. Од кога заврши презентацијата се осеќав убаво, олеснето и исполнето дека помогнав во подигање на свеста за врсничкото насилство што се случува во денешното општество. Дефинитивно би сакал да презентирам пак и пред мои врсници, но и пред основци за оваа тема, заради тоа што темата е од големо значење за сите. Нектарија Јас сум Нектарија Илиевска, ученичка во втора година во гимназијата САБА. Пред да дојдам на оваа работилница имав страв од презентација пред многу луѓе, пред деца, како и запознавање со нови деца, но како што врвеше времето со секоја нова работилница се запознававме со децата. Кога требаше да презентираме и ние како врснички едукатори во нашите училишта нештата се променија и бев многу опуштена. Мило ми е што многу учесници се опуштија и почнаа да споделуваат свои искуства, дали тие биле насилници или пак трпеле насилство. И се надевам дека во иднина повеќе ќе се приклучуваат кон вакви работилници за да влијаеме на намалување на насилството. Теодора П. Јас сум Теодора, учам во средното медицинско училиште и имам 16 години. За оваа презентација сметам дека беше корисна и дека научив многу нови работи. Знам дека оваа презентација ќе ми користи и понатаму и знам дека тие што ме слушаа ќе дознаат нешто повеќе што всушност претставува врсничкото насилство. За презентацијата воопшто немав трема и никој не треба да има трема. Не е ништо страшно и доколку си едуциран за тоа што зборуваш тогаш е лесно да се искажеш за сите оние кои сакаат да те слушаат. Ги оспособуваме младите Facebook-f Instagram Twitter Youtube Flickr Linkedin-in Телефон+389 70 59 43 41+389 72 556 386 ЛокацијаМладински Центар Битола, ул.Крушево, бр.5, 7000 Битола, С. Македонија Поштенска адреса Васко Карангелевски РЕМО 1/3/42, 7000 Битола, С. Македонија Почетна Кои сме Што работиме Новости Донирај Контакт © Copyright 2024 | ymca.mk | Сите права се заштитени. Design & Build by IanMcKenzieCreative

Врсничка школа против врсничко насилство

Во септември се започна со селекција на врснички едукатори на „Врсничка школа против врсничко насилство“ на ИМКА! После информирање и консултација со средните училишта во Битола се започна соработката со 6 средни школи кои избраа заинтересирани ученици. Во следниот период тие поминаa серија на работилници, практична примена на знаењето и на крајот на полугодието станаа врснички едукатори. Во следниот период од два месеци, нова група на ученици подетално се запознаваа со појавата на врсничко насилство и нејзините последици, споделуваа искуства и учеа како да ја адресираат до стручните служби и возрасните и секако, подобро да ја разберат. Теми на кои посебно се задржавме се: Следните 2 работилници во одвиваа во една по поинаква атмосфера каде што учесниците најпрво преку водена медитација размислуваа за врсничкото насилство, без разлика дали им се случило нив или биле сведоци на истото, а потоа преку уметност сето тоа беше изразено индивидуално. Преку боите и креативноста со цртање и создавање на уметнички дела тие споделија што значи да се чувствувате поддржани од врсниците и како сите можеме да играме улога во ставањето крај на малтретирањето. Секоја слика е своја приказна за издржливоста, емпатијата и надежта. Врсничката школа ја водеа психолог и младински работник од ИМКА. По завршувањето на 4-те модули и 2те арт работилници кои го обработуваа врсничкото насилство и темите поврзани со него во нашата локална средина, обучените ученици – врснички едукатори спроведоа презентација пред своите ученици и својот клас до крајот на декември оваа година. Овие врснички едукации беа многу добро прифатени од училиштата, стручните служби, но пред се од самите ученици за кои што беа посветени едукациите. На крајот на учебната година, имавме свечено доделување на сертификатите на врсничките едукатори кои успешно ја завршија едукацијата против врсничкото насилство и одржаа работилници и едукации во своите училишта. Целта на овие работилници беше подигање на свеста за оваа појава со цел нејзино намалување. Со активности продолжуваме и во второто полугодие со ученици од основните училишта во Битола. Проектот „Врсничка школа против врсничко насилство“ на Младинска асоцијација ИМКА Битола претставува продолжение на иницијативата за врсничка школа во рамките на Младинскиот Центар во Битола на теми поврзани со менталното здравје, кои се релевантни за младите, како и за самата Општина. Проектот е поддржан од CVJM #SignsOfHope и Општина Битола се реализира во соработка со 6 средни училишта во градот.

Резиме на клубот GLOW 2024

Во 2024 година, ИМКА во соработка со Мировниот корпус и Американското катче Битола го ревитализираше клубот GLOW (Девојки што го водат нашиот свет) во Битола. Овој клуб има за цел да ги поттикне младите девојки да ги развијат своите вештини и да ги подготви да започнат долги, успешни кариери по завршувањето на нивното образование. Клубот GLOW постоеше во Битола и во останатиот дел од државата пред пандемијата Ковид-19. За жал, овој настан направи пауза во овој клуб, но ние сме среќни што го вративме во 2024 година! Досега одржавме 6 работилници од обновувањето и ќе продолжиме да ја водиме оваа програма во догледна иднина. Враќањето на оваа програма го започнавме со серија информативни сесии одржани во Американското катче Битола. Овие сесии имаа за цел да ги информираат потенцијалните учесници за клубот GLOW и да го измерат интересот. Овие сесии беа многу успешни и успеавме да регрутираме голема група заинтересирани девојки. Ајде да погледнеме во секоја од работилниците што ги организиравме откако ја составивме нашата група. Првата сесија во Американското катче ја водеа Наташа, младински работник во ИМКА и Ивана од Американското катче. Оваа сесија послужи како настан за кршење мраз и тим-билдинг за девојките, овозможувајќи им да се запознаат во релаксирана и добредојдена средина. На овој ден, имавме за цел да ги запознаеме учесничките едни со други, помагајќи им да се чувствуваат удобно и негувајќи чувство на поврзаност во групата. Преку ангажирани активности и отворени дискусии, ги охрабривме да ги споделат своите интереси, искуства и очекувања за програмата. Нашата главна цел за оваа сесија беше да создадеме безбеден и инклузивен простор каде што секоја ќе се чувствува ценета и поддржана, поставувајќи позитивна основа за патувањето што претстои. Вториот собир беше целосно посветен на лидерството. Го започнавме денот со уште неколку вежби за загревање за да им помогнеме на сите да се чувствуваат ангажирани и подготвени да учествуваат. Наташа воведе серија активности за лидерство и градење тим за да го даде тонот на работилницата. Девојките имаа значајни дискусии за тоа што значи лидерството за нив и за квалитетите што го дефинираат силниот лидер. Овие разговори го отворија патот за презентацијата од Наташа каде таа даде согледувања за понатамошно истражување на оваа тема. До крајот на сесијата, девојките имаа многу посилна идеја за тоа што значи да се биде лидер и се надеваме дека ќе ги инспирираме да ја внесат оваа лекција понатаму во нивните животи и самите да станат силни лидери. Нашата трета сесија беше одржана во Младинскиот центар од волонтери на Мировниот корпус, Џек и Алтаф. Заедно со Фулбрајт волонтерката Шелби и Виктор од ИМКА. Заедно, четворицата беа домаќини на презентација за да поучат за вредноста на општественото корисна работа. Џек и Алтаф ја претставија идејата за општествено корисна работа како забавно и исполнувачко искуство во кое секој млад човек треба да биде вклучен. Тие исто така зборуваа за нивните искуства како волонтери на Мировниот корпус и за нивните мотиви да тргнат на едно толку напорно, но сепак исполнувачко патување. Покрај ова, тие исто така ги прикажаа различните придобивки од волонтерството, вклучувајќи развој на заедницата, раст на мрежата, алтруизам и личен раст. Потоа, Виктор се приклучи да ги едуцира девојките за локалните волонтерски можности низ Битола, како и за меѓународните можности. Генерално, оваа сесија послужи како одличен вовед во концептот на волонтеризам и општествено корисна работа. Четвртата сесија беше продолжение на третата сесија. Откако научивме за волонтерската служба, го применивме знаењето што го научивме и се вклучивме во практична волонтерска работа. Заедно со персоналот на ИМКА и волонтерите на Мировниот корпус, учесниците отидоа на Педагошкиот факултет и направија големо чистење. Заедно, работевме на чистење на сите лисја што го покриваа паркингот и патеките, заедно со отстранување на гранките и дрвјата. Овој настан беше одлично дополнување на претходната сесија, овозможувајќи им на девојките шанса да го видат волонтерството на дело и активно да учествуваат во зајакнувањето на нивната заедница. За петтата сесија, Наташа водеше работилница за маркетинг на социјалните медиуми. Со помош на онлајн курсеви за HP, девојките можеа да се вклучат во интерактивни, дигитални работилници поврзани со оваа тема. Овие модули ги научија учесниците како да ги користат социјалните медиуми за да развијат мал бизнис. Тие беа многу едукативни и ги учеа основите на користењето на социјалните медиуми, како на пример како да објавувате органски постови и како да го користите Фејсбук за објавување реклами за бизнисот. На нашата шеста и последна сесија беше вклучена и претставничката од Амбасадата на САД, Ванеса, која ги научи девојките за правилна комуникација за тешки теми. Некои од овие теми вклучуваа како да се испраќа соодветна е-пошта, како да се комуницира со претпоставените и со врсниците и кога да се користи активен или пасивен тон. Ванеса дојде со прекрасна презентација и покажа големо трпение кога предаваше за вакви чувствителни теми. Девојките одлично реагираа на оваа сесија и веруваме дека научија некои вредни лекции во комуникацијата. Досега, веруваме дека нашиот клуб GLOW имаше позитивно влијание врз девојките кои присуствуваа на нашите сесии. Во нашите први шест сесии, опфативме широк спектар на теми за да ги едуцираме и подготвиме учесниците за нивните следни чекори во животот. Со нетрпение очекуваме да го продолжиме овој прекрасен проект во 2025 година со надежи за негово проширување!

Play4Peace Camp во Косово

Од 1 до 6 јули, тим од 8 луѓе од нашата ИМКА присуствуваше на младинскиот проект Play4Peace во Пеќ, Косово заедно со 20 други млади луѓе и младински работници од Србија, Косово и Италија, обединети за градење мир преку спорт. Овој проект вклучуваше 5-дневна програма каде преку различни спортски активности и работилници, учесниците стекнаа длабоко разбирање за критичната улога на младите во напорите за градење мир и помирување. Play4Peace беше интерактивен настан со дискусии, домашни групи, лични размислувања, активности и игри кои може да се применат во секоја организација. Покрај едукативните активности, учесниците имаа можност да посетат 3 града, каде беа поделени во тимови вклучени во бројни активности за градење тимови како што се Escape Room, Photo Challenge и интеркултурна вечер. Во продолжение, неколку сведоштва на некои од нашите учесници: Филип Имам само позитивно мислење за проектот. Очекувањата што ги имав беа големи, па мило ми е што после сето тоа беа исполнети. Додека бев таму, научив многу за тоа што е мир како концепт и како да го пренесам во мојата околина. Навистина сум благодарен за можноста да учествувам. Андреа Како за прв пат на проект, многу се забавував. Научив многу работи и игри и запознав многу нови луѓе. А особено сум среќна што се зближив и подобро се запознав со сите од мојата група и што имав непријатни моменти, но во исто време и смешни ситуации кои ми го направија искуството уште поубаво. Теодора Во изминатата недела, ИМКА ни обезбеди проект и дружба што ние како учесници не ги очекувавме. Овој проект за мене беше голем предизвик и проучување на мене и на луѓето кои беа околу мене. Активностите кои ни беа доделени на сесиите оставија траен впечаток кој верувам дека ќе го применуваме во нашето секојдневие и во иднина. Запознавањето со нови култури и пријатели, нивната отвореност и искреност ми остави силен впечаток. „Play4Peace“ е проект кој не натера емотивно да се отвориме за нови работи, да знаеме како да се почитуваме и што значи пријателство. Нема погрешни одговори, постои само проучување на нови предизвици и авантури кои го чекаат секој поединец. Силно им препорачувам на сите оние кои сакаат да учат нови работи да станат дел од младинскиот тим на ИМКА. Димитриј Имам само позитивни впечатоци за проектот во Косово. Моите очекувања беа надминати. Проектот ни овозможи да се запознаеме и да работиме заедно со млади луѓе од Косово, Србија и Италија. Заедно разговаравме на теми за мир и преку спортски активности, да го примениме наученото. Лора Проектот во Косово во кој учествував ми остави голем впечаток бидејќи бев воодушевена од нивното гостопримство, нивниот професионален пристап кон дадената обврска, начинот на реализација на проектот, како и пренесувањето на главната порака до секој од учесниците. Активностите што беа спроведени треба да се применуваат во секојдневниот живот бидејќи имаат позитивно влијание врз секој од нас во стекнување нови знаења за другите култури, нивната историја и формирање на нови пријателства кои верувам дека ќе бидат трајни, учење што е мир и како да се игра за мир. Доколку добиете шанса да учествувате во ваков проект, пријавете се без размислување и подгответе се за незаборавно искуство кое ќе биде трајно врежано во вашите срца и сеќавања. Лука Имам многу добри впечатоци од мојата прва младинска размена и можам да кажам дека ги надмина моите очекувања. Кога првпат слушнав за оваа размена, сакав да одам да искусам нешто ново во нова земја, да одам на ново место и да запознам нови пријатели. Додека учествував бев многу среќен бидејќи проектот беше поврзан со спортот. Многу сум благодарен на ИМКА за идејата да се запознаат младите од Косово, Србија и Италија преку спорт, тимска работа, преку заедничко учество. Запознав многу добри пријатели од други земји со кои сè уште комуницирам, од кои научив многу за нивните земји, нивната култура, нивната религија итн. Активностите ги препорачувам на секого бидејќи се поврзани со здрав живот и можат да придонесат за ментално да се подобруваме. Помладите поединци ќе имаат најголема корист затоа што се развиваат и им треба добар пример како да растат и да се развиваат, само имајте доверба, не плашете се да се изразувате и знајте дека можете да најдете пријатели од друга земја.

Гласови на промената: Сведоштва од учесниците на Врсничката школа за ментално здравје

Ната Марија Шешиќ – основец од училиштето Ѓорѓи Сугарев Јас сум Ната Марија и бев дел од Врсничката школа за ментално здравје на деца и млади, каде што преку комуникација и дружење научив како да се справам со анксиозноста и паничните напади, како и да немам трема кога треба да имам говор пред публика. Освен тоа што научив нови работи, запознав и стекнав нови познанства и пријателства. Затоа топло ви препорачувам да бидете дел од активностите на ИМКА Битола. Андреа Гроздановска – средношколец од Гимназијата Таки Даскало Кога слушнав за овие обуки одма и без двоумење се пријавив и едвај чекав да почнеме со средбите. Ова беше нешто ново и чекор понапред од тоа само што се зборува насекаде колку е важно менталното здравје. Први обуки каде се работи со млади, тие да научат колку е важно да работат на својот личен раст и развој и да работат на својата самодоверба, да градат здрави односи и сл. За мене оваа школа беше многу интересна, затоа што на секоја средба имаше различна атмосфера, позитивна, забавна но истовремено и смирена. Често се собиравме во круг и споделувавме разни искуства, каде што се чувствувавме ислушани и прифатени такви какви што сме. Во неколкуте месеци дури траеше школата, полека менував некои размислувања, ставови и сфатив некои работи за мене и како да го одржувам моето ментално здравје во форма. Имавме добра социјализација, стекнав многу познанства и се ослободив од стравот на јавен говор. Фуркан Метлику – основец од училиштето Гоце Делчев Јас на оваа школа си поминав многу добро, на секоја обука учев по нешто и заклучив што треба да си променам кај мене. Од сите одржани обуки наученото го пренесував на моите блиски пријатели. Емилија Илиевска – средношколец од средното економско Јане Сандански Во текот на обуките за ментално здравје си поминав многу убаво, научив многу работи, особено како да ги изразувам моите негативни чувства како изнервираност, избувливост и др. Исто така, со овие обуки добив поголема самодоверба за зборување со другите, ако и презентирање пред други луѓе. Мислам дека овие обуки премногу ми помогнаа во секојдневниот живот и им препорачувам на сите да одат барем на една ваква обука, бидејќи многу ќе им помогне. Сара Петровска – студент на Музичка академија Благодарение на врсничката школа за ментално здравје станав врснички едукатор. Успеав да одржам предавања на тема резилиентност на околу деведесеттина ученици и студенти. Нашето подготвување околу сè ова траеше 12 наставни часа во кои работевме на повеќе теми што содржеа теоретски и практичен дел. Учевме и работевме со помош на психолози за кое што сум многу благодарна затоа што денес знам многу повеќе и успеав да се надоградам себе си, и тоа ќе ми служи многу во секојдневието. Сметам дека треба да имаме сè повеќе работилници од ваков тип и гласно да зборуваме со цел да помогнеме, да се едуцираме и здраво да растеме – како што успеавме сега. Јована Талевска – средношколец од средното медицинско Др. Јован Калаузи Ова беше совршена можност да научам пред се да ги идентификувам сопствените емоции, да научам техники и методи кои ќе ми помогнат да го извлечам најдоброто од нив а потоа да бидам во можност да го применам сето тоа за помош и поддршка на моите врсници. Сара Ѓорѓиевска – основец од училиштето Гоце Делчев Премногу сум среќна што ја имав шансата да бидам дел од овој проект и да станам и јас врснички едукатор по ментално здравје. Пријателствата, искуствата и знаењата кои ги стекнав ќе останат со мене засекогаш и сум многу благодарна поради тоа. Се надевам дека во иднина повторно ќе имам шанса дополнително да се развивам во областа на менталното здравје и врсничката едукација. Викторија Јовановска- Меѓународен Славјански Универзитет, Психолошки факултет Во Младинскиот центар во Битола се одржа Школата за врснички едукатори, организирана од АМОС, ИМКА и Порака Нова. Првично слушнав за училиштето од познаници, но не бев точно сигурна за што се работи. Неколку дена подоцна, мојот драг професор, Сашо Кочанковски, ми испрати повеќе информации за настанот и тогаш знаев дека тоа е нешто што ќе ми биде навистина корисно и дефинитивно вреди да учествувам. Работите што ги учиме во врсничката школа се применливи и добро објаснети, па секој од која било област може да ги разбере, да ги искористи за своја корист, а потоа да ги сподели со своите блиски и врсници на едноставен и разбирлив начин. На сите млади луѓе би им препорачал почесто да учествуваат на вакви настани со цел размена на мислења, запознавање нови луѓе и откривање различни перспективи. Тоа би придонело за нивниот личен раст и развој, а потоа и за развој на заедницата. Прочитајте повеќе за настанот тука.

Завршен настан на Врсничката школа за ментално здравје

На 26 јуни, по завршената едукација на врснички едукатори и најголемата врсничка едукација одржана за значењето на менталното здравје во Битола со опфат на над 2000 ученици од основните и средните училишта во Битола, како и на повеќе факултети, се одржа финалниот промотивен настан на проектот. Тоа беше неколкучасовен настан, кој се состоеше од презентирање на резултатите од проектот, но и презентација на дополнителните интелектуални и креативни резултати кои произлегоа од проектните активности. Промотивниот настан започна со презентација на чекорите и фазите низ кои се движеше проектот и како беа сите модули низ кои се организираа децата и младите од основните и средните училишта и учениците. Дискусијата ја отвори Виктор Илиев, претседател на ИМКА Битола, а потоа проф.д-р. Сашо Кочанковски за тоа како се изгради атмосферата меѓу учесниците на модулите за врсничка едукација и општественото влијание што беше остварено врз вклучените едукатори. Во овој дел беше прикажана работата на двете групи за поддршка (групи за лица со попреченост во семејството и групи за еднородителски семејства). За нив презентации одржаа координаторите кои ги водеа групите, Рената Димановска за групата со еднородителски семејства и Мартина Дурљанова за групата семејства со лица со попреченост. Потоа беше прикажан прирачникот според кој беа спроведени работните модули за деца и млади, како и за ранливи групи. Објаснувањето за прирачникот даде Јовче Крстески, кој во соработка со проф. д-р Сашо Кочанковски го подготвуваше изгледот на прирачникот. Пред доделување сертификати за завршени модули за врсничка едукација, со својот музички перформанс пред присутните настапија група врснички едукатори кои изминатиов период активно се подготвуваа. Од темите за ментално здравје што ги работеа изминатата година, тие го создадоа својот текст и под водство на Јасна Димитровска успеаја да ја создадат својата мелодија за тој текст и да ја испеат целата своја идеја пред публиката на овој завршен настан. На крајот следуваше доделување сертификати за учество и споделување благодарност на сите кои учествуваа и го помагаа овој проект во текот на целата година. Се обрати и градоначалникот на општина Битола, Тони Коњановски, на дел од младите кои учествуваа во активностите, како и на учесниците од групите за поддршка кои ја истакнаа потребата од продолжување на овој вид активности во градот, бидејќи нема доволно ваков тип на работа со маргинализирани групи понудени на ниво на Општина Битола. Настанот се одржа во просториите на Europe house во Битола, каде присуствуваа поголем дел од врсничките едукатори, секако и нивните врсници, родители, дел од стручните служби од училиштата, претставници од граѓански организации, како и претставници од општината. Претставниците од Општината дадоа пофални зборови за вложениот труд, труд и енергија за овој проект да се заврши како што треба и да придонесе за збогатување и поттикнување на интересот за оваа проблематика на повисоко и попрофесионално ниво. Со објавувањето на прирачникот, во трендот се приклучува и Битола како град со својот придонес кон темата како да се работи со врсниците на теми важни за нивното ментално здравје и благосостојба. Прирачникот е бесплатен и може да се преземе на следниот линк. Проектот „Училиште за врсници за деца и младинско ментално здравје“ на Младинската асоцијација ИМКА Битола е имплементиран во рамките на регионалната програма за локална демократија во Западен Балкан2 Reload2, финансирана од Европската Унија (ЕУ), имплементирана од Обединетите нации за развој Програма (УНДП). Проектот е кофинансиран од општина Битола. Проектот го спроведува ИМКА во соработка со Порака Нова и Амос.

Впечатоци од учесници од групите за поддршка на ментално здравје

Билјана СтефановскаКако учесник во групата за поддршка на родители на деца со попреченост на самиот почеток разговаравме за проблемите со кои се соочуваме во нашето секојдневие, нешто што ни беше позната приказна на сите, меѓутоа со тек на време тоа премина во взаемна поддршка при што почнавме да си помагаме едни со други, заедно борејќи се со бариерите на системот во кој живееме. Гледајќи ја групата составена само од мајки на деца со попреченост кои се борат за доброто на децата, мојата желба за во иднина заедно со помош на другите учесници и соработници да ги поттикнеме и татковците на овие деца да учествуваат во вакви групи за поддршка се со цел заедно да ги надминеме бариерите и стереотипите околу прилагодувањето и прифаќањето на нашите деца во местото каде живееме и да осетиме дека оваа борба е заедничка. Билјана СтојановскаНа самиот почеток на групите за поддршка ми се вртеше една мисла во главата, а тоа е дека и овие ќе бидат како и секој друг проект што сме учествувале, ради реда да се помине низ процесот или дека има некоја позадина. Меѓутоа со тек на време многу позитивно бев изненадена од тоа како бевме прифатени, овозможувајќи ни да си ги споделиме нашите проблеми, а за кои добивавме конкретни насоки кон тоа да го најдеме ако можеме никулецот на тој проблем или пак со соодветни техники да научиме да го совладаме или да ја намалиме тешкотијата на нашиот проблем. Групата, членовите соработниците направи да се почувствуваме посебни како личности, а не само како родители на деца со посебни потреби. Во иднина би сакала во овој проект да се вклучи целото семејство, односно татковците, како и браќата и сестрите на децата со посебни потреби и заедно да ги совладаме проблемите кои секојдневно не окупираат. Јасмина ГелевскаОваа година за прв пат се вклучив во група за поддршка на родители кои имаат деца со попреченост. Тоа е едно прекрасно искуство од кое станавме попозитивни личности, добивме многу поддршка, совети, храброст и сфативме дека повеќе вредиме и вреди да се бориме. Сите учесници станавме како едно семејство и нашето дружење ќе продолжи во иднина. Создадовме силна врска со помош на стручните лица и им сме благодарни за тоа. Ги повикувам сите лица кои се соочуваат со ваков проблем да не се двоумат и да се вклучат во вакви групи бидејќи заедно е полесно и можеме сѐ. Мое мото: Ние немаме избор да бираме, ние мора да се бориме за нас и нашите најмили. Бојана АртиновскаНе знаев што да очекувам, прв пат имам искуство со психолози. Знаев само дека треба да се соочам со мојата вистина. За среќа многу брзо стекнав доверба и се осетив безбедно во групата. Успеав да се соочам со повеќе стравови и научив да споделувам, а во исто време да бидам тука и за другите членови од групата, т.е. да слушам. Научив многу за менталното здравје преку теоретските предавања, но искуствените Гешталт вежби ми помогнаа многу брзо да дојдам до одговори и ми отворија можност за понатамошна работа со себе. Најголемата придобивка мислам дека е тоа што научив свесно да приоѓам кон проблемите, знаејќи дека постои решение, само треба да погледнам од друга перспектива. Препознавањето на проблем ми помага мене лично, но исто така чувството за поддршка и сочувство во мене е сега поизразено кога ќе го воочам и кај друг. Го охрабрувам секој кој се пронаоѓа во проблематикава да се приклучи доколку е во можност. Прифаќањето помош мислам дека е една од најтешките работи која треба сите да ја учиме. Ова беше едно прекрасно искуство за мене и бескрајно сум благодарна.

Преглед на активностите од групата за поддршка на еднородителски семејства

Од Рената Димановска Размислувајќи за изминатите шест месеци од водење на нашите групи за поддршка, исполнета сум со длабоко чувство на благодарност за неверојатното патување што го споделивме. Кога започнавме со оваа активност, водечки мотив со мојот колега Љупчо ни беше создавање на безбеден простор, ослободен од предрасуди каде што секој еден ќе може отворено да разговара за потешкотиите со кои секојдневно се соочува и начините на кои може да се справи со истите. Заедно, негувавме заедница каде што се слуша секој глас и секоја приказна се цени. Сведоци сме на длабоки моменти на ранливост, издржливост и раст. Членовите храбро ги споделија своите искуства, наоѓајќи не само поддршка, туку и сила да се справат со нивните предизвици. И најважно од сѐ е тоа што нашите дискусии поттикнаа емпатија и поврзаност, потсетувајќи ги членовите дека не се сами во нивните борби. Алатките и сознанијата добиени овде ги потикнаа членовите да направат значајни промени во нивните животи и да им пристапат на своите предизвици со обновена надеж и самодоверба. Во изминатите неколку месеци беше опфатен широк спектар на теми од областа на менталното здравје, помеѓу кои беа: што е ментално здравје и како да се грижиме за истото, што точно претставува анксиозноста и начини на справување со истата, појава на панични напади и техники за справување, пострауматско стресно нарушување, траума и работа со трауматичен настан, предизвици на современото родителствување, родителски стилови, стилови на комуникација, отпорност и многу други теми. Морам да нагласам дека повеќето теми беа проследни со искуствени вежби кои и тоа како помогнаа за учесниците да го искусат она што сме го разговарале.  Благодарни сме на нашите учесници што беа дел од ова патување и што ги направија изминатите шест месеци вистински трансформативни. Со овие активности Врсничката школа за ментално здравје на деца и млади дојдоа во својата финална фаза. Проектот „Врсничка школа за ментално здравје на деца и млади“ на Младинска асоцијација ИМКА Битола се спроведува во рамките на регионалната програма за локална демократија во Западен Балкан 2 Reload2, која е финансирана од Европската Унија (ЕУ), а ја имплементира Програмата за развој на Обединетите Нации (УНДП). Проектот „Врсничка школа за ментално здравје на деца и млади“ на Младинска асоцијација ИМКА Битола е кофинансиран од Општина Битола. Проектот е спроведуван од ИМКА во соработка со Порака Нова и Центар за човекови права Амос. За впечатоци од учесниците прочитајте тука

Преглед на активностите од групата за поддршка на родители на деца со попреченост

Од Мартина Дурлјанова Нашата група за поддршка е „Група за оддишка“ како што често ја нарекуваат родителите кои имаат деца со попреченост. Се работи за родители херои, кои се оставиле многу позади другите, на забот на времето за да бидат столбот на семејството. Но тоа го прави секој родител нели? Сепак родителите на децата со попреченост не го имаат само товарот на семејството, туку и товарот на “пу пу скраја да е“ погледите, товарот на општеството кое им ја отежнува и така тешката ситуација, неприфаќањето од пошироката фамилија, одделувањето од сите социјални собири, настани, дружења па и едни обични излегувања. Благодарение на проектот „Врсничка школа за ментално здравје“ ја отворивме групата за поддршка каде се отвори простор не само за дружење туку и психолошка поддршка и место каде што се откриваат и најтемните страни кои долго се криеле кај овие родители, теми за кои никогаш немале можност да разговараат, насоки за кои не биле свесни дека можат да се отворат и разговори за кои не биле свесни дека може да се остварат. Низ реализираните дванаесет средби кои започнаа од ноември минатава година па се до јуни оваа година поминавме бројни теми. Почнавме со менталната хигиена како тема, па така по менталната чистка продолживме подлабоко да навлегуваме во нови теми и да ги откриваме мрачните страни на издржливоста (онаа очекувана и наметлива), па како таа раѓа анксиозност и депресија, ја тишти самодовербата и сето тоа допринесува да се зголемува стресот во секојдневието, за на крај да не можат да се справат со (не)поддршката и (не)прифаќањето од околината и институциите, но и она најтешкото, поддршката од семејството која ретко ја имаат. А цел тој процес се повторува постојано, со секоја нова случка, надвор или дома, со секој еден настан поврзан со детето. За среќа ние создадовме една комфорт зона, каде родителите со душа чекаат да дојдат да разговараме на нови теми но и да се навратиме на некоја од старите, затоа што секој ден крои нова приказна, нов предизвик со кој моментално мора да се соочат, па со помош на психологот ги разговараат, разглобуваат во детали за тоа како се чувствувале тогаш во тој момент, а како сега додека раскажуваат. И да не ја занемариме и поддршката од самата група, која меѓусебно си помага за полесно справување на проблемите. Желбата на родителите за да продолжиме да ја водиме групата и после завршувањето на проектот е голема, па така ние не би застанале тука, туку би продолжиле да се движиме со исто темпо и понатаму со цел да им излеземе во пресрет на нивните потреби. Со овие активности Врсничката школа за ментално здравје на деца и млади дојдоа во својата финална фаза. Проектот „Врсничка школа за ментално здравје на деца и млади“ на Младинска асоцијација ИМКА Битола се спроведува во рамките на регионалната програма за локална демократија во Западен Балкан 2 Reload2, која е финансирана од Европската Унија (ЕУ), а ја имплементира Програмата за развој на Обединетите Нации (УНДП). Проектот „Врсничка школа за ментално здравје на деца и млади“ на Младинска асоцијација ИМКА Битола е кофинансиран од Општина Битола. Проектот е спроведуван од ИМКА во соработка со Порака Нова и Центар за човекови права Амос.. За впечатоци од учесниците прочитајте тука